2024 гъэм бадзэуэгъуэм и 7-м УФ-м и Президентым и полномочнэ лIыкIуэу КИФЩI-м щыIэ Чайкэ Юрэ щыIащ иппотерапиемкIэ «Целебный Ессентуки» центрым.
Узыншагъэр щрагъэфIакIуэ псапэ центр, Пятигорск епархиер зи дэIэпыкъуэгъуу лажьэм щекIуэкIащ Тэрч къэзакъыдзэм и зэгухьэныгъэм къызэригъэпэща «Посажение коня» фестивалыр.
Аращ зэреджэр а пасэрей Iуэхум. Абы хыхьэу щIалэхэр шым тесу зы хъурей къратын хуейт, уанэм къемыхуэхыу, дзэ зэгухьэныгъэм хыхьэным зэрыхуэхьэзырыр къагъэлъагъуэу.
Фестивалым хыхьэу щIалэ 93-рэ Iуэхум хэтащ. Абыхэм фэеплъ лентIхэмрэ Iуэхум зэрыхэтам щыхьэт техъуэ щIыхь тхылъхэмрэ иратащ.
Чайкэ Юрий зэхыхьэм хэтахэм ящыщ зым – Фомченков-Бровкэ Александр иритащ Iуэхум щыхьэт техъуэ тхылъыр. Илъэси 2,5-рэ хъу къэзакъыр шым тесщ икIи и къалэныр щIыхь пылъу игъэзэщIащ.
Iуэхум хэтащ урысейпсо къэзакъ зэгухьэныгъэм и атаман Кузнецов Виталий, Пятигорск, Черкесск щIыналъэхэм я архиепископ Феофилакт, Пятигорск къалэм и Iэтащхьэ Ворошилов Дмитрий, Тэрч къэзакъ зэгухьэныгъэм и атаман Савченкэ Владимир.
Чайкэ Юрэ кIуащ иппотерапиемкIэ Центрым, зи ухуэныгъэр и нэIэм щIэтым.
Дзэ Iуэху хэхам хэта щIалэхэм епсэлъащ ар, «Реабилитация и социальная адаптация участников СВО и их семей» Iуэхум хэтхэм. ИппотерапиемкIэ апхуэдэхэм я узыншагъэр ирагъэфIэкIуэным теухуащ ар.
УIэгъэ хъуахэмрэ фэбжь зиIэхэмрэ папщIэ къызэрагъэпэщащ я узыншагъэр зэрырагъэфIакIуэ Iэмал, инструкторхэр ягъэхьэзыращ.
***
Фигу къэдгъэкIыжынщи, 2021 гъэм мэкъуауэгъуэм УФ-м и Президентым и полномочнэ лIыкIуэу КИФЩI-м щыIэ Чайкэ Юрэ и дэIэпыкъуэгъуу иппотерапиемкIэ «Целебные Ессентуки» центрым манеж къыщызэIуахащ. Зи узыншагъэм сэкъат иIэ,Кавказым и Минводы хыхьэ къалэхэмрэ гъунэгъу щIыналъэхэмрэ щыпсэу сабийхэмрэ ныбжьыщIэхэмрэ нэхъ псынщIэу я узыншагъэр ирагъэфIэкIуэнымкIэ щхьэпэщ ар.