Фэеплъ пэкIум хэтащ Пятигорск, Черкесск щIыналъэхэм я архиепископ Феофилакт, урысейпсо къэзакъ зэгухьэныгъэм и атаман Кузнецов Виталий, Тэрч къэзакъ зэгухьэныгъэм и атаман Савченкэ Владимир, Пятигорск къэрал университетым и ректор Горбунов Александр, жылагъуэм щыщхэр, дзэм къулыкъу щызыщIэхэр, хабзэхъумэ IэнатIэхэм я лэжьакIуэхэр, къалэм и пост №1-м щылэжьахэр.
Зы дакъикъэкIэ щыгъуа нэужь «Мыужьыхыж мафIэ» фэеплъым удз гъэгъахэр тралъхьащ. Армеец ныбжьыщIэхэм «Урысейм и ЛIыхъужьхэр» плац-парадыр ирагъэкIуэкIащ.
ХьэщIэ лъапIэхэр щыIащ ЦIыхубэ музейм, дзэ Iуэху хэхам хэт «Терек» гупым зэрахьа лIыгъэм теухуа хьэпшыпхэр щахъумэм.
Пятигорск и армеец ныбжьыщIэхэр хьэщIэхэм яхутепсэлъыхьащ дзэ-патриот Iуэхум зэрыхэтам. Пост №1-нэ 1973 гъэм накъыгъэм и 9-м къызэрагъэпэщам цIыху мин 50-м щIигъу тетащ, мини 2-м щIигъур дзэ училищэ нэхъыщхьэм щIэтIысхьащ.
Ноби еджакIуэхэм я лэжьыгъэр ягъэзащIэ, нэхъыжьхэм щапхъэ трахыу. Тхьэмахуэм къриубыдэу къалэ-зыгъэпсэхупIэм и еджапIэхэм щеджэхэр чэзууэ абдеж щоплъыр.