Хэкум и хъумакIуэхэм я махуэм, Минводы щагъэлъэпIащ 694-нэ мотострелковэ батальон щхьэхуэр зэраухуэрэ илъэс 28-рэ зэрырикъур. Ар тхыдэм хыхьащ генерал Ермолов и батальону. Зэхыхьэр ирагъэжьащ къэзакъхэр фэеплъым деж щызэхуэсри.
- 90 гъэхэм къэзакъ зауэлIхэм я лъабжьэр зыгъэтIылъар фэращ, - захуигъэзащ Тэрч къэзакъыдзэм и атаман, «Тэрч» бригадэм и унафэщI, СВО-м къулыкъу щызыщIэ Савченкэ Владимир ермоловецхэм. – Нобэ тэрчыдзэм и къэзакъхэр аргуэру зэкъуэувэри Тэрч батальоныр яухуащ, бригадэ хъужар. Тэрч хабзэхэр къэзыщтахэм, зауэм и ветеранхэм къывбгъэдэкIыу фIэхъус фхуесхыжынщ. Тэрчыдзэр зэпымыууэ щытыкIэ гугъухэм хэту, къэралым зыщIигъакъуэу къокIуэкI.
Минераловодскэ муниципальнэ округым и Iэтащхьэ Вячеслав Хэкум и хъумакIуэхэм я махуэмкIэ абыхэм ехъуэхъуащ икIи ягу къигъэкIыжащ къэзакъхэм я тхыдэм Урысейм и къэралым и тхыдэм къыгуэхыпIэ зэрыхуимыIэр.
Ветеран ермоловец Синицын Александррэ Губенкэ Олегрэ батальоныр зэраухуар ягу къагъэкIыжащ дзэ атаман, къэзакъ генерал Шевцов Владимир и жэрдэмкIэ. Абыхэм ягу къагъэкIыжащ япэ Шэшэн зауэм зи къулыкъу зыгъэзащIэу хэкIуэда я ныбжьэгъухэр, батальоным хэтахэр.
Епархием къэзакъхэм ядэлэжьэнымкIэ и щоджэн нэхъыжь Фещенкэ Стефан Минераловодскэ благочинием и щоджэнхэм я гъусэу къулыкъу щищIащ хэкIуэда къэзакъхэм я фэеплъым деж. Щоджэным ермоловецхэм яжриIащ Пятигорск, Черкесск щIыналъэхэм я архиепископ Феофилакт зэрыарэзыр, зэхуэсахэм Урысей тхыдэм къэзакъхэм щаIэ мыхьэнэр ягу къигъэкIыжри.
«Надежда» скверым деж щагъэува фэеплъым удз гъэгъахэр трилъхьа нэужь къэзакъхэр Ермолов Алексий и фэеплъым деж кIуащ.