КъБР-м и Новоивановскэ къуажэм и Иоанно-Богословскэ члисэм и унафэщI
щоджэн Бондарь Виталий Тхьэм и Анэм и Благовещения махуэшхуэм и пэ къихуэу Май
районым щыпсэу цIыху 70-м щIигъум Къэбэрдей-Балъкъэрым и лъапIэныгъэхэм
защригъэплъыхьащ.
Зи узыншагъэм къимыхь нэхъыжьхэм, ныкъуэдыкъуэхэм, абыхэм я адэ-анэхэм
папщIэ, «Сильные духом» проектым хэтхэр, районым и центрым и нэIэм щIэтхэр,
ныкъуэдыкъуэхэмрэ лэжьыгъэм и ветеранхэмрэ щыIащ республикэм и члиситхум. Ахэр
Иоанно-Богословскэ члисэ Новоивановскэ дэтым, Симеоновскэ члисэм, Магдалинэ Марие
и цIэр зезыхьэу Налшык щыIэм, Бахъсэн къалэм и Покров члисэм, Прохладнэ къалэм и
Никольскэ члисэм щыIахэщ.
Районым щыпсэу куэдым, я узыншагъэм къызэримыхьым къыхэкIыу япэу
къахуихуауэ аращ щIыпIэ лъапIэхэм кIуэну. Псыхуабэ епархием Налшык щиIэ округым и
благочиннэ щоджэн нэхъыжь Бобылев Валентин Столпник Симеон и цIэр зезыхьэ члисэ
зэхуэхьэсам зэращыIущIар гукъинэж ящыхъуащ. Члисэмрэ музеймрэ защригъэплъыхьащ
щоджэн Осипов Константин.
ЦIыхухэм социальнэ Iуэхутхьэбзэхэр щыхуащIэ, КъБР-м и Май районым и
ЗэзыгъэуIу центрым и унафэщI Гусевэ Татьянэ и псалъэм къыхигъэщащ щIыналъэ
лъапIэм щыкIуахэм ящыщу япэу апхуэдэ гурыщIэхэр зэриIэр. Абы жиIащ район къэс
хуэныкъуэ нэхъыжьхэр, ныкъуэдыкъуэхэр зэрыщыIэр икIи апхуэдэхэм ядэлэжьэн
зэрыхуейр.