Мэхъэчкъалэ епархием и сайтымкIэ хъыбар къызэрыдагъэщIамкIэ, 2022 гъэм
дыгъэгъазэм и 6-м, фIэщхъуныгъэ зиIэ джыназ пэлъытэ Невский Александр и фэеплъ
махуэм, Мэхъэчкъалэ и Успенскэ кафедральнэ члисэ зэхуэхьэсам тхьэлъэIу литургиер
щригъэкIуэкIащ Ставропольскрэ Невинномыскрэ я митрополит Кирилл. Абы къулыкъур
драгъэкIуэкIащ Псыхуабэ, Черкесск щIыналъэхэм я архиепископ Феофилакт,
Мэхъэчкъалэрэ Грознэрэ я архиепископ Варлаам, Владиавказскрэ Аланскрэ я архиепископ
Герасим, Георгиевскрэ Прасковейскрэ я епископ Гедеон, Тихорецкрэ Кореновскрэ я
епископ Стефан. Кавказ Ищхъэрэм и щIыналъэхэм я пастыр нэхъыщхьэхэр Дагъыстэным
кIуащ Мэхъэчкъалэ епархием и илъэси 10 юбилейм хэтын папщIэ. Пщыхьэщхьэм
кафедральнэ члисэ зэхуэхьэсам тхьэлъэIу щрагъэкIуэкIащ.
Мэхъэчкъалэ епархием и чристэнхэм я фIыщIэ тхьэлъэIур тхьэлъэIу литургием
хыхьэу иригъэкIуэкIащ Псыхуабэ, Черкесск щIыналъэхэм я архиепископ Феофилакт.
Махуэшхуэ тхьэлъэIу нэужьым архиепископ Варлаам къызэхуэсахэм фIэхъус ярихащ икIи
фIыщIэ хуащIащ я зэгъусэ тхьэлъэIум папщIэ.
Ставропольскрэ Невинномыскрэ я митрополит Кирилл махуэшхуэм хэтхэм
захуигъэзащ пастыр нэхъыщхьэм и псалъэкIэ икIи щихъ Игнатий (Брянчанинов),
Кавказскэ и епископым и теплъэр тыгъэ яхуищIащ. Архиепископ Феофилакт епархием
тыгъэ хуищIащ КъегъэлакIуэ Христос и теплъэр.
А махуэ дыдэм, Мэхъэчкъалэ «Первой русской учительнице» фэеплъым деж япэ
мывэр щагъэтIылъащ щихъ Невский Александр и цIэр зезыхьэ члисэ зэхуэхьэса
ухуэныгъэм и щIыхькIэ. Мывэр зэрагъэтIылъам и къулыкъур иригъэкIуэкIащ
Мэхъэчкъалэрэ Грозненскрэ я архиепископ Феофилакт, епархием и клирикхэм я гъусэу.
ТхьэлъэIум хэтащ УФ-м и Президентым и полномочнэ лIыкIуэу КИФЩI-м щыIэ
Чайкэ Юрий, Кавказ Ищхъэрэм и щIыналъэхэм я пастыр нэхъыщхьэхэр, Дагъыстэным
щызэхуэсахэр, Мэхъэчкъалэ епархием и IуэхущIапIэр илъэси 10 зэрырикъум теухуар.
***
Мэхъэчкъалэ епархиер 2012 гъэм дыгъэгъазэм и 26-м къызэрагъэпэщащ Урыс Чристэн
Члисэм и Синод ЛъапIэм и унафэкIэ. 2013 гъэм щIышылэм и 27-м КъегъэлакIуэ Христос и
цIэр зезыхьэ Члисэм Москварэ Урысей псомрэ я Патриарх Кирилл архимандрит Варлаам
(Пономарев) и хиротониер Мэхъэчкъалэрэ Грозненскрэ я епископ цIэр зэрылъагъэсам и
щIыхькIэ иригъэкIуэкIащ.