Кисловодск къалэм и Никольскэ члисэ зэхуэхьэсам «Всё для победы» псапэ
бэзэрыр щызэхэтащ. Абы щызэхуахьэса ахъшэмкIэ дэIэпыкъуащ Украинэм щыIэ
зауэлIхэм.
Псапэ Iуэхур къызэрагъэпэщащ икIи ар ирагъэкIуэкIащ Чристэн Свято-Никольскэ
классическэ гимназием и егъэджакIуэхэмрэ и гъэсэнхэмрэ. Абы хэтащ гимназием и класс
псори. Сабийхэм ядэIэпыкъуну адэ-анэхэри къэкIуащ, дэлэнхэр, тортхэр, блиныхэр,
булкэхэр, печенэхэр ящIри. Апхуэдэу екIуэлIапIэм и лэжьакIуэхэмрэ абы екIуалIэхэмри
Iуэхум хэтащ.
ЗэрыщIыIэми емылъытауэ зэхуэсым ирихьэлIэу псори кIуащ. Ягъэхьэзыра
шхыныгъуэхэр Iэнэм тралъхьащ, IэфIыкIэхэр, фэилъхьэгъуэхэр, сурэтхэр, тхылъхэр,
ныбжьыщIэхэм ягъэхьэзыра хьэпшыпхэр.
Псапэ бэзэрым и лэжьыгъэм арэзы техъуэу, Чристэн гимназием икIи члисэ
зэхуэхьэсам я унафэщI щоджэн нэхъыжь Знаменский Иоанн псапэ Iуэхум и мыхьэнэр
зыхуэдэр жиIащ, Донбасс щыщ сабийхэмрэ ди зауэлIхэмрэ ядэIэпыкъуным хэлъхьэныгъэ
хэущIыным. Щоджэным члисэм къэкIуахэр къыхуриджащ зэкъуэувэу псапэ Iуэхум
хэтыну.
УнафэщIым и псалъэм къыпэджэжащ цIыху щэ бжыгъэхэр, зэпымыууэ члисэ
зэхуэхьэсам къакIуэхэр, къалэ-зыгъэпсэхупIэм и хьэщIэхэр. Сом мини 140-м щIигъу
зэхуахьэсащ, «Кисловодск. За наших!» къалэ псапэ фондым ягъэхьыну, Украинэм щыIэ ди
зауэлIхэр зыхуеинухэмрэ Донбассс щыщ сабийхэм ИлъэсыщIэ саугъэтхэр хуащIэн
папщIэ.