2022 гъэм жэпуэгъуэм и 13-18-хэм Псыхуабэ, Черкесск щIыналъэхэм я
архиепископ Феофилакт, Урыс Чристэн Члисэм и екIуэлIапIэхэр пIалъэкIэ зезыгъакIуэр
щыIащ Тыркуменистаным, къэралым и екIуэлIапIэр пастыр нэхъыщхьэ къулыкъур
щищIэну кIуащ.
Пастыр нэхъыщхьэм тхьэлъэIухэр щригъэкIуэкIащ Тыркуменбаши, Балканабад,
Никольскэ, Александро-Невскэ, Воскресенскэ, Ашхабад и Кирилло-Мефодиевскэ
члисэхэм. ТхьэлъэIу нэужьхэм Щихънагъыр екIуэлIапIэм кIуэхэм епсэлъащ. Дэтхэнэми
упщIэ итыну Iэмал иIащ.
Балканабад архиепископ Феофилакт екIуэлIапIэм и унэр щигъэнэхуащ,
иджыблагъэ зэрагъэпэщыжар. Абдеж екIуэлIапIэм и театрым и «Бременские музыканты»
гупым и артистхэм Пастыр нэхъыщхьэр щагъэгуфIащ.
Тыркуменистаным и къалащхьэм и екIуэлIапIэхэм я чристэн щIалэгъуалэм
архиепископ Феофилакт Ашхабад щыIущIащ. Щоджэн нэхъыщхьэр щIалэгъуалэм
яхутепсэлъыхьащ духовнэ школхэм зэрыщеджам. ФIэщхъуныгъэ зиIэ щIалэгъуалэр
Щихънагъым усэ къыхуеджащ, уэрэдхэр жаIащ, упщIэ зыжанэкIэ зыхуагъэзащ.
«Дапщэщи фызэрызэпсалъэр ди лъапIэныгъэ нэхъыщхьэщ», - жиIащ Пастыр нэхъыщхьэм
зэхыхьэм хэтхэм защыхуигъазэм. «Фи Iыхьлыхэмрэ ныбжьэгъухэмрэ я фIэщхъуныгъэр
фхъумэныр Члисэмрэ Тыркуменистаным щыпсэухэмрэ къулыкъу хуэщIэным и лъабжьэщ,
- жиIащ Щихънагъым. ЩIэныгъэ зрагъэгъуэтынымрэ лэжьыгъэмрэ щехъулIэну
захуигъэзащ щIалэгъуалэм Пастыр нэхъыщхьэм.
Архиепископ Феофилакт Патриаршэ благочиние Къэзань и духовнэ семинарием и
екIуэлIапIэхэм и студентхэм я хиротоние къулыкъур иригъэкIуэкIащ. Къардэн, пресвитор
къулыкъухэр яхуигъэфэщащ Беседин Алексей, Довлетов Николай (Сердар), Ухоботов
Иоанн. Къардэн къулыкъур хуэфащэу къилъытащ Чарыев Борис (Бяшим). Иджыпсту
Тыркуменистаным и екIуэлIапIэ 12-м щоджэн 19-м къулыкъу щащIэ. Дэтхэнэми духовнэ
щIэныгъэ иIэщ. Студентхэм пащэ Къэзань и духовнэ семинарием щеджэн. Апхуэдэу
Пастыр нэхъыщхьэм щоджэн нэхъыжь Григорьянц Альвиан и постриг къулыкъур ищIащ
щихъ апостол Фома и цIэр фIищри. Апхэудэу къэралым и екIуэлIапIэхэм антиминс
лъапIэхэр яритащ.
Архиепископ Феофилакт Тыркуменистаным и щоджэнхэм Ашхабад щыIущIащ.
Псом япэу Урыс Чристэн Члисэм Москварэ Урысей псомрэ щиIэ Патриарх ЛъапIэ
Кирилл и фIэхъусыр ярихыжащ икIи Христос и Члисэмрэ Тыркуменистаным исхэмрэ
къулыкъу зэрыхуащIэм папщIэ фIыщIэ яхуищIащ. Щоджэнхэм социальнэ къулыкъу
зэпымыууэ зэращIэм, узэщIыныгъэ лэжьыгъэхэр зэрырагъэкIуэкIым папщIи фIыщIэ
яхуищIащ. Пастыр нэхъыщхьэм жиIащ чристэн екIуэлIапIэхэр Тыркуменистаным и
властым и органхэм зэрыдэлажьэр, члисэ-фэеплъхэр хъумэным, гуманитарнэ
дэIэпыкъуныгъэхэр щIэным и IуэхукIэ.
Щихънагъыр щоджэнхэм щхьэхуэу епсэлъащ, екIуэлIапIэхэм я Iуэху зэIумыбзхэм
къытеувыIащ. Пастыр нэхъыщхьэм кърихьэлIахэм зыхуагъэзащ Москварэ Урысей псомрэ
я Патриарх Кирилл фIыщIэ хуащIыну, Патриаршэ благочинием и екIуэлIапIэхэм и нэIэ
зэртригъэтым папщIэ.