Вузым и сайтым хъыбар къзэрыдигъащIэмкIэ, 2022 гъэм мэкъуауэгъуэм и 14-19-хэм Псыхуабэ къэрал университетым щокIуэкI «Духовно-нравственные ценности традиционных религий: сохранение и укрепление в реальном и цифровом мире» щIалэгъуалэ зэхуэсыр. Ар къызэригъэпэщащ Псыхуабэ къэрал университетымрэ муслъымэн щэнхабзэр, щIэныгъэр, егъэджэныгъэр дэIыгъынымкIэ Фондымрэ.
2022 гъэм мэкъуауэгуъэм и 15-м зэхуэсым и япэ пленарнэ зэIущIэр зэхэтащ. Ар фIэхъускIэ къызэIуихащ Псыхуабэ къэрал университетым и ректор Горбунов Александр. Зэхыхьэм хэтхэм хъуэхъукIэ захуигъэзащ Муслъымэнхэм я духовнэ управленэм и унафэщI Таджуддин Талгат.
Псыхуабэ, Черкесск щIыналъэхэм я архиепископ Феофилакт, зэхуэсым и хьэщIэхэм защыхуигъазэм жиIащ: «Нобэрей ди зэхыхьэр теухуащ нобэ дызыгъэгузавэ Iуэхум. ГаджетхэмкIэ пщэдджыжь пощтым дыщеплъкIэ, къагъэхьа тхыгъэхэм, расписанием щхьэусыгъуэ къыдогъуэтри зыдогъэзахуэ. Ауэ щыхъукIэ, ар дунейпсо бэджыхъым дызэщIишэу арауэ пIэрэ лъэныкъуэхэмкIэ здымыплъыхьу? Ар ехьэлIауэ щытыгъэнущ нэгъуэщIхэм дазэремыпсалъэм. Ди зэхуэсыр щхьэпэ хъну сыщогугъ. Нэхъыщхьэр дунейпсо бэджыхъым дыкъикIыу иджырей дунейм дыкъытехьэнырщ».
Пленарнэ зэIущIэм хэтащ Кавказ Ищхъэрэм ис Муслъымэнхэм я ЗэзыгъэуIу центрым и унафэщI Бердиев Исмэхьил, УФ-м и Президентым и полномочнэ лIыкIуэу КИФЩI-м щыIэм и дэIэпыкъуэгъуу федеральнэ округым щыIэ Валев Айдамир, Псыхуабэ къалэ Думэм и унафэщI Похилько Людмилэ, нэгъуэщI хьэщIэ лъапIэхэр.
Пленарнэ зэIущIэ нэужьым ирагъэжьащ «Вопросы формирования общероссийской гражданской идентичности и укрепления межконфессиональных и межнациональных отношений» урысейпсо щIэныгъэ-практикэ конференцэр.
А зэхуэсым хэтщ цIыху 250-м щIигъу. Абы щыщу 31-р къэралым и егъэджэныгъэ IуэхущIапIэхэм ящыщщ, 18-р дин зэгухьэныгъэхэм, УФ-м и субъект 20 къызэщIиубыдэу.