Кисловодск къалэм и Чристэн Свято-Никольскэ классическэ гимназием щекIуэкIащ къалэм и «Солнце Земли Русской – святой благоверный великий князь Александр Невский» щIэныгъэ-практикэ егъэджэныгъэ конференцэр. КъызэгъэпэщакIуэхэм зэхуэсыр траухуащ щихъ Невский Александр къызэралъхурэ илъэс 800 зэрырикъум. Конференцэр къыхэзылъхьахэм я мурадыр – я Iуэху еплъыкIэхэмкIэ зэхъуэжэнырщ, дин, светскэ школхэм я зэдэлэжьэныгъэм зрагъэужьынырщ. Зэхыхьэм зэхуишэсащ щоджэнхэр, Кисловодск администрацэм и лIыкIуэхэр, чристэн щэнхабзэм и лъабжьэхэмкIэ егъэджакIуэхэр, къалэ школым и класс нэхъыжьхэм щIэсхэр, гимназием и гъэсэнхэр.
Гимназием и актовэ пэшым утыку къыщрахьащ сурэт щIынымкIэ Невский Александр и гъащIэм теухуа выставкэр, фIэщхъуныгъэ зиIэ джыназым и цIэр зезыхьэ члисэхэм, щихъым и щIыхькIэ къыдагъэкI тхылъхэм, абы и цIэр зезыхьэ къулъшырыфым теухуа сурэт гъэлъэгъуэныгъэхэр.
Конференцэм хэтхэм фIэхъус ярихащ гимназием и унафэщI щоджэн нэхъыжь Знаменский Иоанн. Зэхуэсым и лэжьыгъэм и пэ къихуэу «Солнце Земли Русской» музыкэ-литературэ композицэм зыкъыщагъэлъэгъуащ гимназием и 5-6 классхэм щIэсхэм. Конференцэм хэтхэм фIэхъускIэ захуигъэзащ егъэджэныгъэмкIэ Управленэм и унафэщIым и къуэдзэ Константиновэ Светланэрэ Кисловодск къалэ администрацэм щэнхабзэмкIэ и комитетым и унафэщI Сквиренкэ Иннэрэ.
Щихъым и ехъулIэныгъэхэмрэ цIыху цIэрыIуэхэм, къэхъугъэхэм я фэеплъыр хъумэнымрэ къытеувыIащ Псыхуабэ епархием щихъхэр канон щIынымкIэ и комиссэм и унафэщI иеромонах Елевферий (Казаков). Елевферий щоджэн Гурин Александррэ Осининэ Мариерэ Тхьэм папщIэ бэлыхь куэд зрагъэшэчахэм, гуэныхьхэр зрагъэIуэтэжахэм, XX лIэщIыгъуэм фIэщхъуныгъэ зиIэ и щихъхэм ятеухуа «Святые наших дней» тхылъыр утыку кърахьащ, Псыхуабэ, Черкесск епархием и Iэгъуэблагъуэм залымыгъэ зыщрахахэм.
«Александр Невский как миссионер: проповедь христианства среди поморов и открытие епархии в Золотой Орде» докладыр утыку кърихьащ Успенскэ Второафонскэ Бештаурскэ цIыхухъу къулъшырыфым и иеродиакон, члисэ-тхыдэ музейм и унафэщI Иоанн (Галумов).
Конференцэм къыщыпсэлъащ школ №2-м и 10 классым щIэс Цаюк Михаилрэ Асрумян Ариаднэрэ, гимназием и епщIанэ классым щеджэ Рочевэ Елизаветэ.
Конференцэр щызэхуащIыжым гимназием и унафэщIым абы хэтахэм гу лъаригъэтащ ныбжьыщIэхэм Хэкур фIыуэ ялъагъуу, нэхъыжьхэм я зэфIэкIым иригушхуэу къагъэхъун зэрыхуейм.