2021 гъэм жэпуэгъуэм и 27-29-хэм Сочэ къалэм щекIуэкIащ Урыс Чристэн Члисэм социальнэ къулыкъу щIэнымкIэ и XII щIыналъэ зэхуаку конференцэр. Конференцэм и япэ махуэм абы хэтхэм зыхагъэгъуэзащ Ипщэ, Кавказ Ищхъэрэ федеральнэ округхэм я социальнэ проектхэм.
Псыхуабэ епархием и лIыкIуэхэм социальнэ къулыкъу зыщIэхэр я пашэу «ДыгъафIэ къалэ» центрым, иппотерапиемкIэ «Целебный Ессентуки» центрым социальнэ къулыкъу щIэным ехьэлIа я Iуэху бгъэдыхьэкIэхэр утыку къыщрахьащ. Сабий ныкъуэдыкъуэхэм хуащIэ дэIэпыкъуныгъэхэм тепсэлъыхьащ «ДыгъафIэ къалэм» и волонтёр Боровиков Владимиррэ иппотерапиемкIэ центрым и щоджэн Тростинский Сергийрэ.
Псыхуабэ епархием и социальнэ лэжьыгъэхэр къилъытащ Синод къудамэм и унафэщI Леонтьевэ Вероникэ. Абы къыхигъэщащ епархием и щоджэн нэхъыщхьэм социальнэ къулыкъухэм зегъэужьынымкIэ и дэIэпыкъуныгъэхэр.
Зэхуэсым и етIуанэ махуэм абы хэтхэм яIущIащ члисэ псапэ щIэнымрэ социальнэ къулыкъу лэжьынымкIэ Синод къудамэм и унафэщI епископ Пантелеимон.
Конференцэм и ещанэ, иужьрей махуэм, Синод къудамэм и къэпщытакIуэхэр тепсэлъыхьащ социальнэ лэжьыгъэм и иджырей практикэхэм. Зэхыхьэм хэтхэр къытеувыIащ фадэмрэ афиянымрэ дахьэхахэм, псэупIэншэхэм, щытыкIэ гугъу къихута унагъуэхэм уазэрыдэIэпыкъунум, гуапагъэ зыщIэ шыпхъухэм я лэжьыгъэр къызэрызэбгъэпэщынум, ныкъуэдыкъуэхэм я гъащIэр зэребгъэфIэкIуэнум, кризис щытыкIэ къихута бзылъхугъэхэм зэразыщIэбгъэкъуэнум.
Ипщэ, Кавказ Ищхъэрэ федеральнэ округхэм я Iэгъуэболагъуэм члисэ социальнэ IуэхущIапIэ 450-м щIигъу щолажьэ. Зэхыхьэм цIыхуи 100-м щIигъу хэтащ – социальнэ къудамэхэм я лэжьакIуэхэр, псапащIэ проектхэм я унафэщIхэр.