2021 гъэм шыщхьэуIум и 22-м къэзакъхэм я Духовнэ центрым, Горячеводскэ къуажэм Тхьэм и Анэм и Успения къэзакъ члисэм и Iэгъуэблагъуэм, Тэрч къэзакъыдзэм и атаманхэм я советым и зэIущIэ щекIуэкIащ. Советым и лэжьыгъэм хэтащ Псыхуабэ, Черкесск щIыналъэхэм я архиепископ Феофилакт.
Дзэ советыр къызэрагъэпэщащ Москва и Урысейпсо къэзакъхэм я зэгухьэныгъэм и атаманхэм, къэзакъхэм я зэIущIэшхуэм и пэ къихуэу, щэкIуэгъуэм КъегъэлакIуэ Христос и члисэм щрагъэкIуэкIыну траухуам, властым и щIыналъэ, муниципальнэ органхэм я лIыкIуэхэм зэрадэлэжьэнум къытеувыIащ, щIэблэм я дин егъэджэныгъэм, гъэсэныгъэм тепсэлъыхьащ. Тэрч къэзакъхэм я дежкIэ псом хуэмудэу мыхьэнэ иIэщ иужьрей упщIэм.
Кавминводы, ЕссэнтIыгу районым, Тэрч кадет къэзакъ корпусыр зэрыщаухуэнум псори акъылэгъу техъуащ, Кавказ Ищхъэрэ федеральнэ щIыналъэм и къэзакъ унагъуэхэм я щIэблэр щрагъэджэнум. Корпусым и ухуэныгъэр ирагъэжьэнущ члисэм и лъабжьэм япэ мывэр щагъэтIылъу, Тэрч къэзакъыдзэм и хъумакIуэ, щихъ апостол Варфоломей и щIыхькIэ. КъищынэмыщIауэ, атаман Кузнецов Виталий къэзакъхэм я егъэджэныгъэр зэпамыгъэуным теухуа упщIэр зэфIихащ – щIыналъэм къыщызэIуахынущ Мосвка и еджапIэ нэхъыщхьэм и къудамэ, Разумовскэм и цIэр зезыхьэ япэ къэзакъ университетым.
Атаманым Москва щызэхуищIыжа лэжьыгъэм иужь хъуащ тэрч къэзакъхэр ТекIуэныгъэ Иныр къызэрахьрэ илъэс 77-рэ щрикъум ирихьэлIэу ТекIуэныгъэм и Парад Ут Плъыжьым 2022 гъэм накъыгъэм и 9-м къыщызэрагъэпэщынум зэрыхэтынум теухуа унафэр. Къэзакъхэм я зэIущIэшхуэ Москва щекIуэкIынум хэтынущ тэрч-къэзакъ тIощI, станицэм и къэзакъ зэгухьэныгъэхэм я атаманхэр.
Къэзакъхэм я нэхъыжь, щIыхьым и хеящIэ Месечко Александр советым унафэ къыщищтащ духовнэ щэнхабзэхэр къызэпамыудыным, атаманхэр
къыхуриджащ щIалэгъуалэм жыджэру ядэлэжьэну: «Дэ къэкIуэну диIэнукъым, ди щIалэгъуалэр чристэн фIэщхъуныгъэм тету дымыгъасэмэ, къэзакъ хабзэхэм щIэдмыпIыкIмэ. Ди нэхъыжьхэм я фэеплъымкIэ жэуаплыныгъэ ин къытлъос».
Дзэ щоджэн нэхъыжь Самойленкэ Павел атаманхэм яритащ къэзакъхэм ядэлэжьэнымкIэ Синод комитетым и унафэщI, Ставропольскрэ Невинномыскрэ я митрополит Кирилл икIи диIыгъащ атаман советхэр къызэгъэпэщыным ехьэлIа хабзэр, къэзакъхэр члисэм хэшэным теухуар: «Къэзакъхэм я къарур аращ зытеухуар, Члисэм и зэкъуэтыныгъэрщ», - къыхигъэщащ пастырым.
Тэрч къэзакъ, Псыхуабэ, Черкесск щIыналъэхэм я архиепископ Феофилакт арэзы техъуащ жэрдэмхэм, дзэ атаманым зи гугъу ищIахэм: «Иджыпсту мывэхэр щызэщIакъуэж зэману къызолъытэр, ди щIэблэм я къэкIуэнум папщIэ члисэхэм я ухуэныгъэм и чэзууэ, мыбдеж щыдгъэсэнухэм икIи къэнэжынухэм».
Щихънагъыр арэзы техъуащ щоджэнхэр нэхъыбэу щIалэгъуалэмрэ къэзакъхэмрэ епсэлъэн зэрыхуейм теухуа гупсысэм икIи атаманхэм я фIэщ ищIащ Псыхуабэ епархием ар, пастыр нэхъыщхьэу щыткIэрэ, щоджэнхэм сыт щыгъуи едэIуэну зэрыхьэзырыр, къэзакъ зэгухьэныгъэхэр ефIэкIуэным и IуэхукIэ.