2021 гъэм накъыгъэм и 9-м Кисловодск щекIуэкIащ «МылIэжын полк» Iуэхур. Къалэдэс минхэр, Чристэн Свято-Никольскэ классическэ гимназием и гъэсэнхэри хыхьэу, я нэхъыжьхэм я портретхэр яIыгъыу къалэ-зыгъэпсэхупIэм и уэрамхэм ирикIуащ «Солдатам Родины» фэеплъым нэс. Абдеж щекIуэкIащ «Сквозь года звенит Победа!» пэкIур. Фэеплъым деж гимназием и къэзакъ ныбжьыщIэхэм ягу къыщагъэкIыжащ зауэм и лIыхъужь хэкIуэдахэр.
ПэкIум къыщыпсэлъащ: ФедерацэмкIэ советым и комитетым и унафэщI Артамонов Анатолий, Кисловодск къалэ-зыгъэпсэхупIэм и Iэтащхьэ Курбатов Александр, къалэ Думэм и унафэщI Волошинэ Любовь, къалэ Думэм и депутат, Никольскэ члисэ зэхуэхьэсам и клирик щоджэн нэхъыжь Чеканов Димитрий.
Щоджэныр IутIыжымрэ ТекIуэныгъэ ИнымкIэ ехъуэхъуащ къалэ-зыгъэпсэхупIэм щыпсэухэмрэ абы и хьэщIэхэмрэ, зауэм и ветеранхэмрэ тылым и лэжьакIуэхэмрэ ТекIуэныгъэм хуащIа хэлъхьэныгъэр къалъытэу.
***
Зауэ зэманым кисловодскдэс мини 10-м щIигъум Хэку зауэшхуэм лIыгъэ, хахуагъэ, шыIэныгъэ къыщагъэлъэгъуащ. Сэлэт, офицер мин 600 Кисловодск и сымаджэщхэм щагъэхъужа нэужь, зауэм Iухьэжащ. Къалэм и тхыдэм хатхащ Совет Союзым и лIыхъужь 24-м, ЩIыхь орденым и кавалеритIым я цIэхэр. Кисловодск къалэм хуагъэфэщащ Хэку зауэшхуэ орденым и япэ нагъыщэр.