2021 гъэм мазаем и 15-м Псыхуабэ, Черкесск щIыналъэхэм я архиепископ Феофилакт пащтыхь шэнтиуэ махуэшхуэр щригъэкIуэкIащ Налшык къалэм апостол пэлъытэ Магдалинэ Марие и цIэр зезыхьэ члисэ зэхуэхьэсам и Сретенскэ члисэм. Щоджэн нэхъыщхьэм къулыкъур драгъэкIуэкIащ къалэм и члисэхэм я щоджэнхэм благочиннэ щоджэн нэхъыжь Бобылев Валентинрэ къардэн нэхъыжь Кубэ Димитрийрэ я пашэу. Пастыр нэхъыщхьэм и гъусэу Тхьэ елъэIуащ къалэдэсхэр.
А махуэ дыдэм зауэлI-афганецхэм я фэеплъ Къэбэрдей-Балъкъэрым щыIэм удз гъэгъахэр тралъхьащ. Мазаем и 15-м ягъэлъэпIащ Афганистаным советыдзэр къызэрырашыжрэ илъэс 32-рэ зэрырикъур. «Нобэ зи псалъэ зыгъэпэж, зи тхьэрыIуэр зымыгъэпцI цIыхум и махуэщ. ХэкIуэда зауэлIхэр игъащIэкIи тщыгъупщэнукъым! Ди лъэпкъым текIуэныгъэ къэзыхьхэр къегъэщI, апхуэдэу къэгъуэгурыкIуащ, иджыри апхуэдэу къек1уэк1ащ. Невский Александр зэрыжиIэмкIэ, къарур – пэжыгъэрщ», - жеIэ архиепископ Феофилакт.
ИужькIэ пастыр нэхъыщхьэр IущIащ Къэбэрдей-Балъкъэр къэрал университетым и егъэджакIуэхэмрэ и студентхэмрэ. ЕджапIэм и сайтым зэритымкIэ, зэпсэлъэныгъэр гуапэу ирагъэжьащ. Коронавирус узыфэм пэщIэтыным хуищIа хэлъхьэныгъэм папщIэ «Патриаршая благодарность» медалыр Щихънагъым иритащ КъБР-м узыншагъэр хъумэнымкIэ и министерствэм СПИД-мрэ инфекцэ узыфэхэмрэ пэщIэтынымкIэ и Центрым и фельдшер-лаборант Рудь Наталье.
Архиепископ Феофилакт студентхэм псалъэкIэ захуигъэзащ. Ар къытеувыIащ цIыхум и хьэл-щэнхэм, лъагъуныгъэм, шыIэныгъэм, гущIэгъум. ГъащIэм зызыщIэбгъэкъуэн уиIэным и мыхьэнэм, абы къежьапIэ хуэхъум. Щихънагъым жэуап иритащ зэхуэсахэм я упщIэхэм.