2021 гъэм щIышылэм и 24-м Псыхуабэ къалэм и Лазаревскэ члисэм къэзакъ жорым пэгъунэгъуу тхьэлъэIу щрагъэкIуэкIащ XX лIэщIыгъуэм къэхъуа Iуэхум хыхьэу хэкIуэда къэзакъхэр ягу къыщагъэкIыжу. Архиепископ Феофилакт и арэзыныгъэкIэ тхьэлъэIур иригъэкIуэкIащ Псыхуабэ епархием къэзакъхэм ядэлэжьэнымкIэ и къудамэм и унафэщI щоджэн нэхъыжь Фещенкэ Стефан. Щоджэным къэзакъхэмрэ абы и унагъуэм щыщхэмрэ Щихънагъым къыбгъэдэкI псалъэхэр ялъигъэIэсыжащ лIэщIыгъуэ и пэкIэ къэхъуа гузэвэгъуэм теухуауэ.
А махэу дыдэм Винсанды къуажэм и Михайловскэ члисэм тхьэлъэIу литургие нэужьым унафэщI щоджэн Марков Андрейрэ къуажэм и зэгухьэныгъэм и къэзакъхэмрэ ягу къагъэкIыжащ къэзакъхэр зэхэзехуэн щащIам хэкIуэдахэр. Кисловодск и Никольскэ члисэ зэхуэхьэсам къулыкъур щригъэкIуэкIащ Кисловодскэ члисэ округым и благочиннэ, члисэ зэхуэхьэсам и унафэщI щоджэн нэхъыжь Знаменский Иоанн. Къэзакъхэм я псэр зэгъэн папщIэ Тхьэ елъэIуну зэхуэсащ Кисловодскэ къалэ къэзакъ зэгухьэныгъэм и къэзакъхэм атаман Семёнов Александр я пашэу. Благочиннэм ягу къигъэкIыжащ тхыдэм и напэкIуэцI шынагъуэхэр, къэзакъхэмрэ урыс лъэпкъхэмрэ я нэгу щIэкIар.
КъБР-м и Котляревскэ станицэм и Покров члисэм, фIэщхъуныгъэ зиIэ къэзакъхэри фэеплъ махуэм щызэхуэсащ, политикэ залымыгъэм и зэранкIэ лажьэншэу ягъэкIуэда къэзакъхэр ягу къагъэкIыжын папщIэ. ТхьэлъэIур иригъэкIуэкIащ члисэм и унафэщI щоджэн Арманов Николай.
***
Илъэси 102-рэ и пэкIэ, 1919 гъэм щIышылэм и 24-м РКП (б)-м и ЦК-м и Оргбюром къищтащ «Ко всем ответственным товарищам, работающим в казачьих районах» унафэр, ВЦИК-м и УнафэщI Свердлов Яков и Iэр зыщIэлъыр. Абы ипкъ иткIэ «къэзакъхэм я унафэщIхэр, щIэныгъэлIхэр гъэкIуэдын хуейт, совет властым пэщIэт дэтхэнэ къэзакъхэри хыхьэу». А политикэм къыхэкIыу къэзакъ мелуанитIым щIигъу Урысейм и щIыналъэхэм щагъэкIуэдащ.