2020 гъэм дыгъэгъазэм и 28-м Кисловодск и Чристэн Свято-Никольскэ классикэ гимназием педсовет щекIуэкIащ. Зэхыхьэм и пэщIэдзэм IуэхущIапIэм и унафэщI щоджэн нэхъыжь Знаменский Иоанн егъэджакIуэхэм ехъуэхъуащ гъэ еджэгъуэм и илъэс ныкъуэр зэрынагъэсамкIэ икIи гимназиер къызэзыгъэпэща Псыхуабэ, Черкесск щIыналъэхэм я архиепископ Феофилакт гимназием и нэIэ зэрытригъэтым, духовнэ, мылъку дэIэпыкъуныгъэхэр зэрахуищIэм папщIэ. Апхуэдэу егъэджакIуэхэм я зэфIэкIми къытеувыIащ, щыуагъэхэм гу лъатэжыну, щIэблэр ирагъэджэнымрэ ягъэсэнымрэ ирагъэфIэкIуэну къыхуриджащ.
Егъэджэныгъэ-гъэсэныгъэ лэжьыгъэхэмкIэ унафэщIым и къуэдзэ Рочевэ Иннэ презентацэ игъэхьэзыращ дэтхэнэ зы классми дерсхэмкIэ яIэ зэфIэкIым теухуауэ. УнафэщIым гъэсэныгъэ IуэхухэмкIэ и къуэдзэ Синявская Татьянэ къытеувыIащ щихъ Невский Александр къызэралъхурэ илъэс 800 зэрырикъур 2021 гъэм зэрагъэлъэпIэнум.
УнафэщIым Iуэху щхьэхуэхэмкIэ и къуэдзэ Знаменская Ольгэ къытеувыIащ гимназиери грант проектым зэрыхэтым, урыс къэзакъхэм ехьэлIауэ къэрал политикэр гъэзэщIэнымрэ экстремизмымрэ терроризмымрэ земыгъэубгъунымрэ теухуауэ. Гимназием и егъэджакIуэ къардэн нэхъыжь Иоанн (Галумов) къытеувыIащ чристэн щэнхабзэм и лъабжьэмкIэ школ олимпиадэм кърикIуахэм.
Дыгъэгъазэм и 29-м гимназием и егъэджакIуэхэмрэ гъэсэнхэмрэ щызэхуэсащ Свято-Никольскэ члисэ зэхуэхьэсам, фIыщIэ тхьэлъэIур щекIуэкIам икIи олимпиадэхэмрэ зэпеуэхэмрэ къыхэжаныкIа гимназием и гъэсэнхэм щIыхь тхылъхэр щратыжам. Гъэсэн нэхъыфIхэм унафэщIым тыгъэ яхуищIащ я цIэр зытет тхьэлъэIу литургие тхылъхэр. Апхуэдэу Иоанн сабийхэм IэфIыкIэхэр яритащ щоджэн нэхъыщхьэмрэ Ставрополь крайм и губернаторымрэ къабгъэдэкIыу.
Дыгъэгъазэм и 30-м Кисловодск и администрацэм щекIуэкIащ къалэм и цIыхубзхэм я советым и зэхуэс. Абы къалэ Думэм и унафэщI Волошинэ Людмилэ къалэм и Iэтащхьэм и фIыщIэ тхылъыр щритыжащ унафэщIым Iуэхугъуэ щхьэхуэхэмкIэ и къуэдзэ Знаменская Ольгэ. Курбатов Александр Ольгэ фIыщIэ хуищIащ илъэс куэд щIауэ зэрылажьэм, Кисловодск къалэ-зыгъэпсэхупIэм и цIыхубзхэм я зэгухьэныгъэм хэлъхьэныгъэфI зэрыхуищIам папщIэ.
А махуэ дыдэм гимназием и гъэсэн псори ТхьэлъэIу литургием хэтащ. ЕгъэджакIуэхэм тхьэлъэIу уэрэдхэр жаIащ икIи Христос и щэхухэм зыхагъэгъуэзащ. Гимназием гъэ еджэгъуэм и япэ илъэс ныкъуэр щызэхуащIыжащ.