Азие Курыт митрополичье окургым и тхыдэм Синодым и япэ зэIущIэр 2020 гъэм зэпэIэщIэу ирагъэкIуэкIащ. Округым и Iэтащхьэ, Ташкентскрэ Узбекистанскрэ я митрополит Викентий зэхыхьэр иригъэкIуэкIащ. ЗэIущIэм къыщыпсэлъащ Псыхуабэ, Черкесск щIыналъэхэм я архиепископ Феофилакт, Урыс Чристэн Члисэм и екIуэлIапIэхэм я Патриаршэ благочиниер пIалъэкIэ Тыркуменистаным щызезыгъакIуэ, Бишкекскрэ Кыргызстанскрэ я епископ Даниил, Душанбинскрэ Таджикистанскрэ я епископ Павел.
Синодым и зэIущIэр къыщызэIуихым, митрополит Викентий къыхигъэщащ: «Эпидемием и щытыкIэ гугъуми емылъытауэ, члисэ гъащIэр зэрызэпымыуар солъагъу, тхьэлъэIухэр ирагъэкIуэкIырт, зэпамыгъэууэ… Ди щоджэнхэр дгъэкIуэну Iэмал диIащ, гуэныхьхэр Iуэтэжыным и щэхухэр унэм щрагъэкIуэкIын папщIэ. Апхуэдэу гуфIэгъуэ къэтхьыну дыхущIокъу, духовнэ дэIэпыкъуныгъэ цIыхухэм яхуэтщIэн папщIэ, хуэныкъуэхэм».
ЗэIущIэм щыхэплъащ журнал 21-м, округым и епархием и гъащIэр къыщыгъэлъэгъуэжахэу, 2020 гъэм щIышылэм щыщIэдзауэ жэпуэгъуэ пщIондэ. Синодым хэтхэм гулъытэ нэхъыбэ хуащIащ щытыкIэ мытыншым, къэралым карантиныр къыщыхалъхьам щыгъуэ.
Архиепископ Феофилакт зыубгъуауэ тепсэлъыхьащ дэIэпыкъуныгъэхэм, Патриаршэ благочинием щоджэнхэмрэ клирикхэмрэ екIуэлIапIэм кIуэхэмрэ я унагъуэхэм хуащIахэм. Благочинием и управляющэм ахъшэ игъэхьащ улахуэ ятын, члисэхэм я коммунальнэ Iуэхутхьэбзэхэр ятын, щоджэнхэм я диагностикэ Iуэхухэм папщIэ. ЩытыкIэм зимыхъуэжыхункIэ, благочинием и екIуэлIапIэм и щытыкIэр гугъуу къонэж.
«А узыфэр – дохутырхэр топсэлъыхь абы – узыншагъэм имызакъуэу духовнэ, психикэ щытыкIэми зэран хуохъу. Пастыр псалъэми мыхьэнэшхуэ иIэщ, хущхъуэм хуэдэу. Абы цIыхур хуэгъэхъужынущ, и гур химыгъэщIу, узыфэм пэщIигъэтынущ. Нэхъыщхьэращи, Тхьэм фIыщIэ хуэщIын хуейщ», - жиIащ архиепископ Феофилакт.