2020 гъэм фокIадэм и 1-м Псыхуабэ, Черкесск щIыналъэхэм я архиепископ Феофилакт гъэ еджэгъуэщIэр зэрыщIидзамкIэ ехъуэхъуащ Кисловодск и Чристэн Свято-Никольскэ классическэ гимназием и еджакIуэхэмрэ егъэджакIуэхэмрэ. Эпидемием и зэранкIэ линейкэр тIууэ ягуэшащ. Япэ, епщыкIузанэ классхэм щIэсхэмрэ курыт школымрэ папщIэ щхьэхуэу.
ЛинейкитIми Пастыр нэхъыщхьэм тхьэлъэIухэр щригъэкIуэкIащ, гъэ еджэгъуэщIэм и пэ къихуэу икIи еджакIуэхэм псы гъэнэхуа лъапIэм щыщ ялъигъэIэсащ. Щихънагъыр еджакIуэхэм, абыхэм я адэ-анэхэм, егъэджакIуэхэм ехъуэхъуащ икIи чристэн дневникхэр дэтхэнэ зы гимназием и гъэсэнми яритащ. Махуэшхуэм хэтхэм зыхуагъэзащ къалэ-зыгъэпсэхупIэм и Iэтащхьэ Курбатов Александр. Гимназием и гъэсэнхэр концерт ирагъэплъащ.
А махуэ дыдэм архиепископ Феофилакт игъэнэхуащ щихъ Алексий и цIэкIэ щыIэ члисэ цIыкIур, Кисловодск и Нарзаннэ галереем пэмыжыжьэу щытыр. Щоджэн нэхъыщхьэм и гъусэу Тхьэ елъэIуащ къалэм и члисэхэм я унафэщIхэр, Кисловодск къалэм и Iэтащхьэхэр, члисэ цIыкIур зыухуахэр, зыгъэпсэхупIэм щыпсэухэмрэ абы и хьэщIэхэмрэ. Ягъэнэхуа нэужь, Щихънагъыр тхьэлъэIум хэтхэм ехъуэхъуащ фэеплъыр зэрызэрагъэпэщыжам папщIэ икIи члисэ цIыкIум тыгъэ хуащIащ щихъ Алексий и теплъэр.
***
Кисловодск паркыр зэзыгъэпэща Ребров Алексей 1848 гъэм члисэ цIыкIу ухуэныгъэм и ужь ихьащ, зи проектыр архитектор зэкъуэшхэу Бернардацци сымэ ягъэхьэзырам. 1848 гъэм и бжьыхьэм члисэ цIыкIур игъэнэхуащ Никольскэ члисэм и унафэщI щоджэн нэхъыжь Носичевскэ Стефан, щихъ Алексий и щIыхькIэ. 2019 гъэм члисэ цIыкIур паркым щызэфIагъэувэжащ, Нарзаннэ галереем и гупэм къиту. Члисэ цIыкIур зэрагъэнэхурэ Кисловодск щыпсэухэмрэ абы и хьэщIэхэмрэ папщIэ зэIухауэ щытынущ.