2020 гъэм мазаем и 26-м, гъэшхэкI фIэкI щамышх тхьэмахуэм и бэрэжьейм, Кисловодск и Чристэн Свято-Никольскэ классическэ гимназием щыIащ егъэджэныгъэ IуэхущIапIэр къызэIузыха икIи абы зи нэIэ тет Псыхуабэ, Черкесск щIыналъэхэм я архиепископ Феофилакт.
Гимназием и класс нэхъыжьхэм я зэIущIэхэр хабзэ хъуауэ къызэрагъэпэщ. Къэзакъ классым и гъэсэнхэр, гимназием и унафэщIым и къарукIэ яухуар, къэзакъхэм къытехъукIа щоджэн нэхъыжь Знаменский Иоанн, концерт программэ ягъэхьэзыращ. Синявская Татьянэ зригъакIуэ гимназием и гъэсэнхэм къэзакъ, урыс цIыхубэ уэрэдхэр жаIащ. Еянэ классым щIэс Синявская Полинэ игъэгуфIащ къызэхуэсахэр «В роще калина» уэрэдыр игъэзащIэри. УнафэщIым Пастыр нэхъыщхьэм фIыщIэ хуищIащ гимназием и нэIэ зэрытригъэтым папщIэ.
Шей здефэм, Щихънагъ нэхъыщхьэр гимназием и гъэсэнхэм яхутепсэлъыхьащ чристэнхэм НэщI иным зэрызыхуагъэхьэзырым, фIэщхъуныгъэ зиIэхэм я дежкIэ абы и мыхьэнэм. Пастыр нэхъыщхьэм ягу къигъэкIыжащ уи гупсысэр зэрызэтепIыгъэнур, напэр зэрыпхъумэнур. ЦIыхур и щхьэркъым зыхуэщхьэпэжын хуейр, гуапагъэ нэгъуэщIхэм яхуищIэным хущIэкъун хуейщ ар», - жиIащ щоджэн нэхъыщхьэм.
ЗэIущIэм и Iыхьэ нэхъыщхьэ хъуащ архиепископ Феофилакт гимназием и гъэсэнхэм ярита упщIэхэр. Класс нэхъыжьхэм щIэсхэм яфIэгъэщIэгъуэнт Пастыр нэхъыщхьэр школым зэрыщеджар. Щихънагъ нэхъыщхьэм и гуапэу гимназием и гъэсэнхэм ядэгуэшащ и сабиигъуэм теухуа и гукъэкIыжхэмкIэ. Архиепископ Феофилакт зыр адреймкIэ пхъуэжу зебгъэсэну, социальнэ сайтхэм зэрис зэманым и пIэкIэ тхылъ еджэнхэу, ныбжьэгъухэм епсэлъылIэнхэу, гуапагъэ ялэжьыну, я щхьэм «хьэуэ» жраIэну, Iейм пэщIэтыну, нэгъуэщIхэм егуэпэкIыну къыхуриджащ.