2019 гъэм мэлыжьыхьым и 27-м щыщIэдзауэ мэлыжьыхьым и 28 пщIондэ Псыхуабэ, Черкесск щIыналъэхэм я архиепископ Феофилакт IутIыж тхьэлъэIур щригъэкIуэкIащ Псыхуабэ и Спасскэ кафедральнэ члисэ зэхуэхьэсам. Щоджэн нэхъыщхьэм къулыкъур драгъэкIуэкIащ члисэ зэхуэхьэсам и щоджэнхэм. Махуэшхуэм щызэхуэсащ екIуэлIапIэм кIуэ цIыху минищым щIигъу.
Псыхуабэ и Iэтащхьэ Скрипник Андрей члисэ зэхуэхьэсам тхьэлъэIум и пэ къихуэу ишащ Иерусалим Тхьэм и бэным и члисэм къраха фIыгъуэ мафIэм щыщ. Пастыр нэхъыщхьэм и гъусэу щоджэнхэмрэ екIуэлIапIэм кIуэхэмрэ IутIыж гуфIэгъуэм и нагъыщэм IущIащ Урысейм и Президентым и Администрацэм и УнафэщIым и япэ къуэдзэ Кириенкэ Сергей, Урысейм и Президентым и полномочнэ лIыкIуэу КИФЩI-м щыIэ Матовников Александр, щIыналъэм и властым и лIыкIуэхэр. ХьэщIэхэр зэгъусэ тхьэлъэIукIэ Спасскэ члисэ зэхуэхьэсам
кIуащ икIи IутIыж пщэдджыжь тхьэлъэIум хэтащ. Архиепископ Феофилакт щихъ Иоанн ДыщэIупэ IутIыж нэхум теухуа псалъэ жиIащ. IутIыж Инджылыр тхьэлъэIу литургием хыхьэу щыжаIащ хабзэ зэрыхъуауэ Кавказ Ищхъэрэм ис лъэпкъхэм я бзэхэмкIи. ТхьэлъэIу нэужьым архиепископ Феофилакт артосыр игъэнэхуащ. ТхьэлъэIу нэужьым Пастыр нэхъыщхьэм Псыхуабэ щыпсэу цIыху мин бжыгъэхэмрэ Псыхуабэ къалэм и хьэщIэхэмрэ ехъуэхъуащ Христос и IутIыжымкIэ.