2018 гъэм фокIадэм и 1-м Чристэн Свято-Никольскэ классическэ гимназие Кисловодск къалэм щыIэм зэхыхьэ щекIуэкIащ. Махуэшхуэр тхьэлъэIукIэ ирагъэжьащ. Ар иригъэкIуэкIащ Псыхуабэ, Черкесск щIыналъэхэм я архиепископ Феофилакт, гимназием и унафэщI щоджэн нэхъыжь Знаменский Иоанн, егъэджакIуэ, щоджэн нэхъыжь Чеканов Димитрий, Кисловодск члисэ округым и щоджэн нэхъыжь Лиманов Гермоген сымэ и гъусэу.
ЕджакIуэхэм защыхуигъазэм щихънагъ Феофилакт абыхэм ехъуэхъуащ 27- нэ гъэ еджэгъуэщIэр Чристэн гимназием зэрыригъажьэмкIэ, сабийхэм еджэным ехъулIэныгъэ щаIэну, егъэджакIуэхэмрэ адэ-анэхэмрэ шыIэныгъэ яIэну ехъуэхъуащ, еджакIуэхэм дневникхэр тыгъэ яхуищIащ. Пастыр нэхъыщхьэм гимназием и гъэсэнхэр къыхуриджащ школ зэныбжьэгъугъэр ялъытэну, ар я гъащIэ псокIэ кIуэцIрахыну.
Сабийхэмрэ егъэджакIуэхэмрэ гъэ еджэгъуэщIэмкIэ ехъуэхъуну къызэхуэсащ хьэщIэ лъапIэхэр: къалэ Думэм и унафэщI Волошинэ Любовь, Кисловодск и Iэтащхьэм и дэIэпыкъуэгъу Галий Сергей, къалэ администрацэм щэнхабзэмкIэ и комитетым и унафэщI Сквиренкэ Иннэ, Попечительскэ Советым хэтхэр, Кисловодск егъэджэныгъэмкIэ и Управленэм и лIыкIуэхэр. Волошинэ Любовь къеджащ Ставрополь крайм и губернатор Владимиров Владимиррэ Думэм и депутат Торосян Аркадийрэ гимназием зэрызыхуагъазэ хъуэхъум. Апхуэдэу ар сабийхэмрэ егъэджакIуэхэмрэ ехъуэхъуащ, архиепископ Феофилакт фIыщIэ хуищIащ, къалэ-зыгъэпсэхупIэм гулъытэ къызэрыхуищIым,гимназием и нэIэ зэрытригъэтым папщIэ.
Гимназием и гъэсэнхэм гъэсэныгъэ IуэхухэмкIэ унафэщIым и къуэдзэ Синявская Татьянэ и нэIэм щIэту ягъэхьэзыра концертым хыхьэу хьэщIэхэм хъуэхъу куэд жаIащ. Псом хуэмыдэу гимназием и гъэсэнхэм ягъэгуфIащ шыпхъухэм япэу япэ классым къашахэр. Абыхэм зэгъусэу жаIащ япэ классым кIуэ шыпхъу цIыкIум теухуа уэрэдыр.
Япэ уэзджынэр къегъэуэн щIыхьыр иратащ 11 классым и еджакIуэ Сысоев Артёмийрэ 1 классым кIуэ Курбан-Алиевэ Маринэрэ. Махуэшхуэ программэр щиухым гимназием и егъэджакIуэхэмрэ хьэщIэ лъапIэхэмрэ сурэтхэр зытрагъэхащ.
ИужькIэ щоджэн нэхъыжьым япэ классым кIуахэм я япэ дерсыр иригъэкIуэкIащ. Абы хыхьэу и школ гъащIэм яхутепсэлъыхьащ икIи фIыуэ еджэн папщIэ чэнджэщхэр яритащ. Гимназием и гъэсэнхэм щихънагъыр ягъэгуфIащ тропарыр зэращIэмкIэ. Дерсыр щиухым псоми IэфIыкIэхэр иратащ. Дерс нэужьым архиепископ Феофилакт гимназиер къэзыуххэмрэ адэ- анэхэмрэ епсэлъащ. Щихънагъым абыхэм фIыщIэ яхуищIащ, гимназиер дзыхь къызэрыхуащIам папщIэ икIи Тхьэр къадэIэпыкъуну захуигъэзащ я еджакIуэхэр ягъэсэнымкIэ.