2018 гъэм шыщхьэуIум и 22-м Зеленчукскэ станицэм и Петропавловскэ члисэм щоджэнхэм тхьэлъэIу литургие щрагъэкIуэкIащ икIи щыщIалъхьэжащ Ставрополь духовнэ семинарием и егъэджакIуэ Чукарин Даниил, илъэс 35-м иту дунейм ехыжар.
Даниил 1984 гъэм гъатхэпэм и 31-м Зеленчукскэ станицэм и Петропавловскэ члисэм псаломщицэ Чукаринэ Марие и унагъуэм къыщалъхуащ. Члисэм уэрэд щыжыIэным и гъащIэр хуигъэпсащ Даниил и анэшхуэ Лебединская Евдокия. Абы и пхъурылъхур зэрыцIыкIурэ члисэм ишэурэ члисэ уэрэдхэм дригъэхьэхащ.
2002 гъэм Даниил Санкт-Петербург и духовнэ академием и регент къудамэм щIэтIысхьащ, иужькIэ Академием и пастыр къудамэм щеджащ. 2010 гъэм Даниил Ставрополь духовнэ семинарием члисэ уэрэд жыIэнымкIэ и егъэджакIуэ къулыкъур къыхуагъэфэщащ. Семинарием зэрыщылэжьа зэманым къриубыдэу абы семинар хорым и регентым и къалэнхэр игъэзэщIащ икIи духовнэ школым къулыкъу щищIащ. Преображения махуэшхуэм Даниил Тхьэм и пащхьэм ихьэжащ. Даниил и адэмрэ анэмрэ яхуэгузэващ Псыхуабэ, Черкесск щIыналъэхэм я архиепископ Феофилакт. Псыхуабэ епархием, Санкт-Петербург митрополием, Ставрополь, Екатеринодар епархиехэм я щоджэн 30-м щIигъу, егъэджакIуэхэр, студентхэр, Ставрополь духовнэ семинарием и лэжьакIуэхэр зэхуэсащ Даниил иужьрей гъуэгуанэм трагъэувэжын папщIэ. Псыхуабэ, Черкесск щIыналъэхэм я архиепископ Феофилакт къыбгъэдэкIыу къэпсэлъащ Ипщэ Къэрэшей-Шэрджэс члисэ округым и екIуэлIапIэхэм я благочиннэ Субтельный Евгений.
Ставропольскрэ Невинномыскрэ я митрополит Кирилл къыбгъэдэкI тхыгъэм къеджащ Ставрополь духовнэ семинарием и япэ проректор щоджэн нэхъыжь Самойленкэ Павел. Верейск и архиепископ, Москва и духовнэ академием и ректорым (Даниил Санкт-Петербург и духовнэ школым щыщеджам) къыбгъэдэкI тхыгъэм къеджащ Санкт-Петербург митрополием и клирик къардэн нэхъыжь Стефанов Георгий. Даниил щыщIалъхьэжащ Зеленчукскэ станицэм и Петропавловскэ члисэм и кхъэм.