2017 гъэм бадзэуэгъуэм и 14-м Ипщэ Къэрэшей-Шэрджэс члисэ округым и екIуэлIапIэхэм я благочиннэ щоджэн нэхъыжь Субтельный Евгенийрэ Алиев Д. и цIэр зезыхьэ Къэрэшей-Шэрджэс къэрал университетым и ректор Узденов Таусолтанрэ я зэIущIэ екIуэкIащ. Благочиннэр Таусолтан ехъуэхъуащ КъШКъУ-м и ректор къулыкъур къызэрыхуагъэфэщам папщIэ икIи еджапIэ нэхъыщхьэм дяпэкIи дэлэжьэну зэрыщыгугъыр къыхигъэщащ.
ЗэIущIэм щытепсэлъыхьащ адэкIэ университетымрэ чристэн екIуэлIапIэхэмрэ щIэблэр гъэсэнымрэ узэщIынымрэ я лъэныкъуэкIэ зэрызэдэлажьэм зэрызрагъэужьынум.
Апхуэдэу унафэ ящIащ КъШКъУ-р IэпщIэлъапщIэ ныбжьыщIэхэм я художественнэ выставкэм хэтыну. 2017 гъэм шыщхьэуIум и 2-м ар бегъымбар Илья и фэеплъ гуфIэгъуэ зэхыхьэхэм ирихьэлIэу Архыз Ищхъэрэм и тхыдэ- архитектурэ, археологие комплексым и Iэгъуэблагъуэм къыщызэрагъэпэщынущ.
Благочиннэм жиIащ Къэрэшей-Шэрджэсым и лъапIэныгъэхэм я хэщIапIэхэм деж а махуэм къэралым и щIыпIэ куэдым щыщхэр щIыналъэ лъапIэм Тхьэ щелъэIуну къызэрыкIуэр. ЩIыналъэ зэмылIэужьыгъуэхэм къикIа хьэщIэхэм гъэщIэгъуэн ящыхъунущ республикэм и иджырей IэпщIэлъапщIэхэм я Iэдакъэ къыщIэкIахэр. Таусолтан къыхилъхьащ гъэлъэгъуэныгъэм декоративнэ- прикладной гъуазджэм и хьэпшып щэнхабзэмрэ гъуазджэмкIэ Институтым и еджакIуэхэм ягъэхьэзырахэр утыку кърахьэну.