2017 гъэм бадзэуэгъэум и 8-м, щихъхэу Пётррэ Февронийрэ я фэеплъ махуэм, Кисловодск члисэ округым и екIуэлIапIэхэм я благочиннэ щоджэн нэхъыжь Знаменский Иоанн тхьэлъэIу уэрэд щыжиIащ щихъ Алексей и цIэр зезыхьэ члисэр щаухуэну щIыпIэм деж гуапагъэ щIэным къыщыхуриджэу. ТхьэлъэIум хэтащ Кисловодск къалэм и Iэтащхьэ Курбатов Александр, сенатор Афанасов Михаил, члисэ цIыкIум и ухуакIуэхэр, къалэ-зыгъэпсэхупIэм щыпсэухэмрэ абы и хьэщIэхэмрэ.
ТхьэлъэIу нэужьым благочиннэр псоми ехъуэхъуащ махуэшхуэмкIэ, сенаторымрэ къалэм и Iэтащхьэмрэ фIыщIэ яхуищIащ ухуэныгъэмкIэ къазэрыдэIэпыкъуам папщIэ, щихънагъ нэхъыщхьэ Феофилакт къыбгъэдэкIыу Тхьэр члисэ ухуэныгъэмкIэ къадэIэпыкъуным теухуа хъуэхъур ялъигъэIэсащ.
Члисэ цIыкIур Нарзаннэ галереем пэгъунэгъуу щаухуэжынущ. Ребровскэ члисэ цIыкIур нэхъапэIуэкIэ Ребров Алексей иухуауэ щытащ, Кавказым и япэ тхыдэджхэм ящыщ зым, Кисловодск и зыгъэпсэхупIэ паркыр зыухуам, Кавказым зауэхэм хэтам. 1848 гъэм Ребров Алексей Фэеплъ мывэ жорыр щигъэуващ бгы ЛъапIэм деж (Жор бгым) «1798 гъэм Кисловодск деж урысхэр зэрыщытIысам и щIыхькIэ. 1798 гъэм Кисловодск зыгъэпсэхугъуэ лъэхъэнэр щрагъэжьащ, бгым Жор цIэр иратащ.
Ребров Алексей Кавказым и зыгъэпсэхупIэхэм зегъэужьыным хэлъхьэныгъэфI хуищIащ. Архитектор Бернардацци 1823 гъэм классицизм ухуэкIэм тету Кисловодск щищIа Ребров и унэр къалэм дэт нэхъ кхъахэ дыдэхэм ящыщ хъуащ. Ребров нарзан къыщIэжыпIэм деж члисэ цIыкIу щиухуащ, иужькIэ диныр зэхэзехуэн щыхъуам зэхакъутам. Ар иджы зэрагъэпэщыжынущ.