2018 гъэм щэкIуэгъуэм и 30-м Псыхуабэ, Черкесск щIыналъэхэм я архиепископ Феофилакт, Псыхуабэ епархием и члисэ зэхуэхьэсам и щоджэнхэм щIыгъуу, Свято-Троицкэ Серафимовскэ цIыхубз къулъшырыф Совхознэ къуажэм дэтым тхьэлъэIу литургие щригъэкIуэкIащ икIи игумение Антоние (Бобылевэ) и хьэдэщIэлъхьэ къулыкъур игъэзэщIащ.
ТхьэлъэIу литургиемрэ дунейм ехыжар щIэлъхьэным епха къулыкъухэмрэ хыхьэу тхьэлъэIум хэтащ къулъшырыф гъунэгъухэм я унафэщIхэр, Ставропольем,
Осетие Ищхъэрэм щыщхэр, гуапагъэ зыщIэ шыпхъухэр, къулъшырыфым Тхьэ елъэIуну къэкIуахэр. Iыхьлыхэм яхуэгузэващ Къэбэрдей-Балъкъэрым и Парламентымрэ Правительствэмрэ я лIыкIуэхэр, республикэм и жылагъуэ палатэм, Муслъымэнхэм я дин IуэхущIапIэм щыщхэр. Дунейм ехыжам псалъэ гуапэ хужиIащ КъБР-м щэнхабзэмкIэ и министр Къумахуэ Мухьэдин.
«Антоние фIэщхъуныгъэ быдэ иIащ, псалъэ итам епцIыжыртэкъым, нэгъуэщIхэм Тхьэ яхуелъэIурт. Езым ущеупщIкIэ: Сыт ухуэдэ, дапщэщи фIыуэ жиIэрт! Абы сыт щыгъуи Тхьэм фIыщIэ хуищIырт, нэгъуэщIхэм хуелъэIурти Тхьэм къару къритырт! Дэ фIыуэ тлъагъу Антоние псори цIыхухэм яхуигуэшырт!, - жиIащ архиепископ Феофилакт.
Антоние къулъшырыфым щыщIалъхьэжащ, Троицкэ члисэм и блынхэм пэгъунэгъуу, ар къэщIэрэщIэжыным илъэс 20-м щIигъукIэ хуэлэжьащ.