2018 гъэм накъыгъэм и 24-м, Славян тхыбзэмрэ щэнхабзэмрэ я махуэм, Псыхуабэ и Спасскэ кафедральнэ члисэ зэхуэхьэсам и щIалэгъуалэ центрым Осетие Ищхъэрэ-Алание Республикэм ЩэнхабзэмкIэ и министрерствэм и «Алания» камернэ къэрал хорым и махуэшхуэ концерт щекIуэкIащ. Художественнэ унафэщIыр икIи дирижёрыр – Осетие Ищхъэрэ-Алание Республикэм и цIыхубэ артист, УФ-м гъуазджэхэмкIэ щIыхь зиIэ и лэжьакIуэ, УФ-м и къэрал саугъэтым и лауреат, Хетагуров Коста и цIэр зезыхьэ Къэрал саугъэтым и лауреат Кокойти Агундэщ.
Къызэхуэсахэм фIэхъускIэ захуигъэзащ члисэ зэхуэхьэсам и унафэщI щоджэн Мовчанов Димитрий. Абы ялъигъэIэсащ Псыхуабэ, Черкесск щIыналъэхэм я архиепископ Феофилакт къыбгъэдэкI хъуэхъур икIи апостол пэлъытэхэу, Словен егъэджакIуэхэу Кириллрэ Мефодийрэ я фэеплъ махуэмкIэ, славян тхыбзэмрэ щэнхабзэмрэ я махуэмкIэ ехъуэхъуащ. Члисэ уэрэдхэр, осетин макъамэхэр, зауэ уэрэдхэр, урыс, хамэ къэрал музыкэ щэнхабзэр ЩIалэгъуалэ центрым щыIуащ.
А махуэ дыдэм Суворовскэ станицэм и школ №20-м дерс зэIуха щекIуэкIащ, славян тхыбзэмрэ щэнхабзэмрэ теухуауэ. Станицэм и библиотекэм и лэжьакIуэхэр тепсэлъыхьащ апостол пэлъытэ зэкъуэшхэу Кириллрэ Мефодийрэ, славян алыфбей зэхэлъхьэным и тхыдэм.
Дерсым ирагъэблэгъащ станицэ члисэм и унафэщI щоджэн нэхъыжь Иванилов Роман, я адыгэбзэр яджыну, я щэнхабзэр яхъумэжыну, ахэр зыр зым къыгуэхыпIэ зэримыIэм къыхуезыджахэр. Дерс нэужьым еджакIуэхэм папщIэ викторинэ ирагъэкIуэкIащ.
Псом хуэмыдэу Къэрэшей-Шэрджэсым нэхъ щагъэлъэпIащ славян тхыбзэм и махуэр. ТхьэлъIэу литургиемрэ зэгъусэ тхьэлъэIумрэ республикэм щагъэлъэпIащ апостол пэлъытэхэу Кириллрэ мефодийрэ я фэеплъым деж.
Республикэм и чристэн щоджэнхэм, жылагъуэ зэгухьэныгъэхэм, щIыналъэм щыпсэухэм ар ирагъэкIуэкIащ. ТхьэлъэIу лиутргие нэужьым Черкесск и Никольскэ члисэ зэхуэхьэсам фIэщхъуныгъэ зиIэхэр тхьэлъэIукIэ кIуащ фэеплъым нэс икIи абдеж Тхьэ щелъэIуащ. ИужькIэ къызэхуэсахэм зыхуагъэзащ КъШР-м лъэпкъ Iуэхухэмрэ цIыхубэ коммуникацэхэмкIэ, печатымкIэ и министырм и къуэдзэ Гузко Сергейрэ Ищхъэрэ Къэрэшей-Шэрджэс члисэ округым и екIуэлIапIэхэм я благочиннэ щоджэн нэхъыжь Нартов Александррэ.
А махуэм благочиннэр щыIащ Кавказ Ищхъэрэ къэрал гуманитарно- технологие академием и колледжым. Абы славян тхыбзэмрэ щэнхабзэмрэ я махуэшхуэ ъыщызэрагъэпэщащ. Студентхэм я докладхэр утыку кърахьащ, усэ къеджащ, уэрэдхэр жаIащ. Конференцэм къыщыпсэлъащ щоджэн нэхъыжь Нартов Александр, Баталпашинскэ къалэ къэзакъ зэгухьэныгъэм и къэзакъ Пожидаев Валерий.
КъШР-м и лъэпкъ библиотекэ Байрамуковэ Хьэлимэт и цIэр зезыхьэм иджыблагъэ щоджэнымрэ Медколледжым и студентхэмрэ я зэIущIэ щекIуэкIащ. Щоджэн Иманов Алексей тхыбзэм зегъэужьыным ехьэлIауэ щихъхэу Кириллрэ Мефодийрэ зэфIагъэкIахэм теухуа доклад ищIащ. Библиотекэм и лэжьакIуэхэм хьэщIэхэм папщIэ къызэрагъэпэщащ тхылъ гъуэтыгъуейхэм я гъэлъэгъуэныгъэ, члисэславяныбзэкIэ тхахэри хэту. ЗэIущIэ нэужьым абы хэтахэм удз гъэгъахэр тралъхьащ щихъхэу Кириллрэ Мефодийрэ я фэеплъ библиотекэм пэмыжыжьэу щыIэм.
Махуэшхуэм и пэ къихуэу Черкесск къалэм ЕгъэджэныгъэмкIэ и центр №11- м Урысейм и лъэпкъхэм я духовно-щэнхабзэ лъабжьэхэм я дерс щрагъэкIуэкIащ, славян тхыбзэм и махуэм теухуауэ. Черкесск и Никольскэ члисэ зэхуэхьэсам и щоджэн Гурин Александр еджакIуэхэм яхутепсэлъыхьащ апостол пэлъытэхэу Кириллрэ Мефодийрэ я гъащIэм, абыхэм я лэжьыгъэхэм, славян тхыбзэ къызэгъэпэщыным, ХъыбарыфIхэр зэрыт тхылъ лъапIэр зэдзэкIыным ехьэлIауэ зэфIагъэкIахэм. ИужькIэ къагъэлъэгъуащ махуэшхуэм теухуа фильм. Абы хыхьэу еджакIуэхэр хагъэгъуэзащ тхыдэ къэхъугъэу зэкъуэшхэм я гъащIэм щыщхэр. 2018 гъэм накъыгъэм и 21-м Медногорскэ къуажэм (КъШР) и курыт еджапIэ №1-м и 6-8 классхэм папщIэ актовэ пэшым дерс зэIуха щекIуэкIащ, славян тхыбзэмрэ щэнхабзэмрэ я махуэм теухуауэ. Дерсым и презентацэр игъэхьэзыращ егъэджакIуэ Шузевэ А.А. ЕджакIуэхэм зыхагъэгъуэзащ члисэславяныбзэкIэ тха иджырей, пасэрей тхылъхэм я щапхъэхэм. Выставкэр ягъэхьэзыращ Преграднэ станицэм и Кирилло-Мефодиевскэ члисэм и лэжьакIуэхэм. Члисэм и унафэщI щоджэн Соловьев Алексий и къэпсэлъэныгъэм къыщыхигъэщащ славян
щэнхабзэм КъуэкIыпIэ Европэм ис лъэпкъхэр зэрызэкъуигъэувар.
Махуэшхуэм Преграднэ станицэм и Кирилло-Мефодиевскэ члисэм пащтыхь шэнтиуэ махуэшхуэр щагъэлъэпIащ. ТхьэлъэIу литургие, зэгъусэ тхьэлъэIу нэужьым Ипщэ Къэрэшей-Шэрджэс члисэ округым и екIуэлIапIэхэм я благочиннэ щоджэн нэхъыжь Субтельный Евгений екIуэлIапIэм кIуэхэм пащтыхь шэнтиуэ махуэшхуэмкIэ хъуэхъу Псыхуабэ, Черкесск щIыналъэхэм я архиепископ Феофилакт къыбгъэдэкIыр ялъигъэIэсащ. Махуэшхуэ нэужьым псори шэджэгъуашхэм ирагъэблэгъащ.
Махуэшхуэм хыхьэу Преграднэ станицэм и Кирилло-Мефодиевскэ члисэм пащтыхь шэнтиуэ махуэшхуэр щекIуэкIащ. 2018 гъэм накъыгъэм и 24-м Къэбэрдей-Балъкъэр республикэм зэхыхьэхэр щекIуэкIащ, славян тхыбзэм и махуэм теухуауэ. Славян къеджэныгъэхэр, зэхыхьэхэр, выставкэхэр, концертхэр Май, Прохладнэ районхэм, Налшык къалэм щекIуэкIащ. Налшык округым и щоджэнхэмрэ КъБР-м и «Мир всем» чристэн щIалэгъуалэ центрым щыщхэмрэ хэтащ махуэшхуэм хыхьэу къызэрагъэпэща Iуэхухэм. Мы гъэм махуэшхуэ концерт щекIуэкIащ «Победа» киногъэлъэгъуапIэм и гупэм.
А махуэм Кисловодск и Пантелеимоновскэ члисэм и щоджэн нэхъыжь Лагутин Андрей Кисловодск и курыт еджапIэ №1-м и ебланэ классым щеджэхэм яIущIащ. Ар теухуауэ щытащ славян тхыбзэм и махуэм. Щоджэныр махуэшхуэм и тхыдэм, абы зэрызрагъэужьам, славян алыфбейр зэрызэбграгъэхам, чристэн славян зэкъуэш узэщIакIуэхэу Кириллрэ Мефодийрэ я гъащIэм тепсэлъыхьащ.
Лекцэ нэужьым еджакIуэхэм яухуэ члисэм зыщрагъэплъыхьащ, абы и щытыкIэм, и мыхьэнэм къытеувыIащ. ЕджакIуэхэр Пантелеимоновскэ члисэм гъэмахуэ практикэ щыIэну зэгурыIуащ.
Апхуэдэу а махуэм Рахманинов С. В. и цIэр зезыхьэ Сабий музыкэ школ Кисловодск къалэм дэтым махуэшухэ концерт щекIуэкIащ, славян тхыбзэмрэ щэнхабзэмрэ ятеухуауэ. Къызэхуэсахэм захуигъэзащ щоджэн нэхъыжь Знаменский Иоанн, Кисловодск члисэ округым и екIуэлIапIэхэм я благочиннэм. Концертыр ягъэдэхащ къалэ-зыгъэпсэхупIэм и гупхэм, Чристэн гимназием и сабий хорым.
Минводы къалэм Тхьэм и Анэм и Благовещения члисэм и тхьэмахуэ школым махуэшхуэ концерт щекIуэкIащ. Ар теухуауэ щытащ апостол пэлъытэхэу Кириллрэ Мефодийрэ. Сабийхэр усэ къеджащ, члисэ уэрэдхэр жаIащ, иджырей чристэн уэрэдхэр ягъэзэщIащ. Зэкъуэшхэм папщIэ рассказрэ музыкэ-хореографие композицэрэ ягъэхьэзыращ. ЕджакIуэхэм я лэжьыгъэхэм я гъэлъэгъуэныгъэ къызэрагъэпэщащ.
Махуэшхуэ нэужьым члисэм и унафэщI щоджэн Поддубный Михаил гъэ еджэгъуэ кIуам кърикIуахэм къытеувыIащ. Абы щагъэлъэпIащ пашэ, лауреат хъуа цIыху 14. Концертым нэхъ жыджэру зыкъыщызыгъэлъэгъуахэм школ тхьэ елъэIупIэхэр иратащ. Гъэмахуэ зыгъэпсэхугъуэр къехъулIэным ехьэлIа хъуэхъукIэ концертыр зэхуащIыжащ. Абы хэта псори щызэпсэлъащ IэфIыкIэхэмкIэ гъэнщIа стIолым здыпэрысым.