2018 гъэм мэлыжьыхьым и 27-м Кисловодск зэгъусэ тхьэлъэIу щрагъэкIуэкIащ икIи псынэпсхэр щагъэнэхуащ. 1858 гъэм псынэпсыр ягъэнэхуу щIадзащ, щихъ, Кавказскрэ Черноморскрэ я епископ Игнатий Псыхуабэ и Провал гуэлыр игъэнэхуащ. 1917 гъэм къэхъуа революцэм иужькIэ а хабзэр зэпагъэуащ икIи 2011 гъэм Псыхуабэ епархиер зэфIагъэувэжа нэужь ирагъэжьэжащ.
Псыр гъэнэхун къулыкъур иригъэкIуэкIащ Кисловодск члисэ округым и екIуэлIапIэхэм я благочиннэ щоджэн нэхъыжь Знаменский Иоанн къалэм и члисэхэм и щоджэнхэм я гъусэу. Зэхыхьэм хэтащ: администрацэмрэ Думэмрэ я лIыкIуэхэр, къэзакъхэр, Чристэн Свято-Никольскэ классическэ гимназием и еджакIуэхэмрэ егъэджакIуэхэмрэ, «Сретение» щIалэгъуалэ зэхуэсым хэтхэр, зыгъэпсэхупIэм щыпсэухэмрэ абы и хьэщIэхэмрэ.
Махуэшхуэр тхьэлъэIу литургиекIэ щрагъэжьащ Кисловодск и Никольскэ члисэ зэхуэхьэсам. ТхьэлъэIу нэужьым къалэпсо зэгъусэ тхьэлъэIу ирагъэкIуэкIащ. Никольскэ члисэ зэхуэхьэсам и деж щрагъажьэри ЗыгъэпсэхупIэ паркымкIэ кIуэцIрыкIыу Нарзаннэ галереем нэс зэгъусэ тхьэлъэIу ящIу кIуащ, IутIыж уэрэдхэр жаIэу. Абдеж псыр гъэнэхун тхьэлъэIури щрагъэкIуэкIащ. Щоджэнхэм Нарзаннэ галереем бюветхэр щагъэнэхуащ. Галереер псом нэхъ иным имызакъуэу икIи нэхъ жьыщ. Ар 1948 гъэм яухуащ. НэхъапэIуэкIэ абы Воронцовскэ галереекIэ еджэу щытащ икIи абы нарзан щефэу щытащ. ТхьэлъэIу нэужьым щоджэн нэхъыжь Знаменский Иоанн къызэхуэсахэм
защыхуигъазэм, архиепископ Феофилакт и псалъэхэр ялъигъэIэсащ икIи ехъуэхъуащ къалэм щыпсэухэмрэ абы и хьэщIэхэмрэ 2018 гъэм и зыгъэпсэхугъуэр къызэрыблэгъамкIэ. Благочиннэр зэгъусэ тхьэлъэIухэм я тхыдэм къытеувыIащ, псыр гъэнэхуным и мыхьэнэр зыхуэдэр жиIащ. Щоджэныр къалэдэсхэмрэ абы и хьэщIэхэмрэ я узыншагъэр ягъэбыдэну захуигъэзащ.
Апхуэдэу а махуэм Кисловодск щагъэнэхуащ псынэхэр, псыежэххэр. Зыгъэпсэхугъуэ лъэхъэнэр къыщызэIуахым къалэ администрацэм щэнхабзэмкIэ и къудамэм унафэщI Сквиренкэ Иннэ я пашэу концерт программэ ягъэхьэзыращ, уэрэдхэмрэ къафэхэмрэ ебэкIыу.