2018 гъэм гъатхэпэм и 17-м Зеленчукскэ станицэм Тхьэм папщIэ бэлыхь куэд зрагъэшэча Тирон Феодор и цIэр зезыхьэ члисэм и унафэщI щоджэн Касмицкий Алексий щIыгъуу, Ипщэ Къэрэшей-Шэрджэс члисэ округым и екIуэлIапIэхэм я благочиннэ щоджэн нэхъыжь Субтельный Евгений тхьэлъэIур иригъэкIуэкIащ.
ТхьэлъэIу нэужьым члисэм щекIуэкIащ ЕкIуэлIапIэм и зэIущIэ. ЕкIуэлIапIэм и советым хэтхэр абы щытепсэлъыхьащ 2017 гъэм зэфIагъэкIа лэжьыгъэхэм. Отчет нэужьым, екIуэлIапIэм кIуэхэм ягу къагъэкIыжащ члисэр зыхуей хуагъэзэн зэрырагъэжьар. Иджы члисэр хуабэщ, нэхущ. БлэкIа илъэсым люстрэ къащэхуащ, уэзджынэщIэ фIадзащ. Гъэ къакIуэ ЕкIуэлIапIэм и советым иджыри уэзджынэ зыбжанэ къищэхунущ, ансамбль хъун папщIэ. ЕкIуэлIапIэм и советым къилъытащ 2017 гъэм зэфIигъэкIахэр.
2018 гъэм гъатхэпэм и 18-м Сторожевой станицэм и Никольскэ члисэм щоджэн нэхъыжь Субтельный Евгенийрэ члисэм и унафэщI щоджэн нэхъыжь Кравченкэ Андрейрэ тхьэлъэIу литургие щрагъэкIуэкIащ.
ИужькIэ члисэм ЕкIуэлIапIэм и зи чэзу зэIущIэр щекIуэкIащ. 2017 гъэм ЕкIуэлIапIэм и советым зэфIигъэкIахэм теухуауэ къэпсэлъащ щоджэн нэхъыжь Кравченкэ Андрей. Ар къытеувыIащ екIуэлIапIэм и финанс, хозяйствэ, социальнэ, егъэджэныгъэ Iуэхугъуэхэм.
Щоджэным екIуэлIапIэм къэкIуахэм гу лъаригъэтащ блэкIа илъэсым члисэм и къарукIэ просфор ищIу зэрыригъэжьар.
Апхуэдэу члисэм къыщызэIуахащ члисэславяныбзэ зэзыгъэщIэну зи мурадхэм папщIэ курсхэр: «Дэтхэнэ зыми клиросымкIэ уэрэдхэр жиIэфу зримыгъэсэфынкIэ хъунщ, - къыхигъэщащ унафэщIым, - ауэ тхьэлъэIу тхылъхэм къеджэфу псоми зрагъэсэфын хуейщ. А дерсхэр къыфхуэщхьэпэнущ тхьэлъэIухэм я зэкIэлъыхьыкIэр зыгурывгъэIуэнымкIэ, тхьэлъэIухэм нэхъ жыджэру фыхэтынымкIэ».
УнафэщIым, казначейм, финанс-ревизэ комиссэм и унафэщIым я отчетхэм едэIуа нэужь, ЕкIуэлIапIэм и зэхуэсым хэтхэм къалъытащ 2017 гъэм зэфIагъэкIахэр къехъулIауэ.