2017 гъэм щэкIуэгъуэм и 14-м Псыхуабэ къыщызэIуахащ «Кавказ в начале XXI века: роль публичной дипломатии в противодействии международному терроризму». Ар щэкIуэгъуэм и 14-15- хэм сервисымкIэ, туризмымрэ дизайнымкIэ и Институтым щекIуэкIащ.
Зэхуэсыр зэрекIуэкIа махуитIым къриубыдэу къэпщытакIуэхэр тепсэлъыхьащ публикэ дипломатием и Iэмэпсымэхэр къызэрагъэсэбэпынум, къэралымрэ жылагъуэмрэ я къарур зэщIагъэуIуэу терроризмым Кавказым щыпэщIэтынымкIэ.
Доклад ящIу къэпсэлъащ УФ-м и федеральнэ округитхум я щIэныгъэ жылагъуэм я лIыкIуэхэр: Центральнэ, Ищхъэрэ-КъуэкIыпIэ, Ипщэ, Ищхъэрэ- Кавказ, Сыбыр, хамэ къэралибл (Абхъаз, Азербайджан, Армение, Грузие, Иран, Тырку, Осетие Ипщэ).
Зэхуэсыр къызэрагъэпэщащ: публикэ дипломатиемкIэ Горчаков А. М. и цIэр зезыхьэ фондым, финанс мониторингымкIэ КИФЩI-м и щIыналъэ зэхуаку управленэм, Кавказ Ищхъэрэм и федеральнэ университетым, абы Псыхуабэ щиIэ къудамэм, граждан жылагъуэм зегъэужьынымкIэ Институтым Ставрополь щиIэ щIыналъэ жылагъуэ зэгухьэныгъэм, «Единство», Кавказ Ищхъэрэм и «Развитие» жылагъуэ-щIэныгъэ IуэхущIапIэхэм.
Зэхыхьэм щыщIидзэм зэхуэсым хэт псоми ягу къагъэкIыжащ щэкIуэгъуэм и 12-м щIыр щыхъеям хэкIуэдахэр, Иранымрэ Иракымрэ я гъунапкъэм деж.
Зэхуэсыр къызэIуихащ Псыхуабэ къалэм сервисымкIэ, туризмымрэ дизайнымкIэ и Институтым и унафэщI профессор Шыбзыхъуэ Татьянэ. Абы зэхуэсым и президиумым хэтхэм я цIэ къриIуащ:
Поспелов Валерэ – Департаментым и къудамэм и унафэщIыр.
Виташов Дмитрий – УФ-м финанс мониторингымкIэ и Федеральнэ къулыкъущIапIэм финанс терроризмым пэщIэтынымкIэ иIэ управленэм и унафэщIым и къуэдзэр.
Жмурко Юрий – Горчаков А. М. и цIэр зезыхьэ публикэ дипломатиемкIэ фондым и гъэзэщIакIуэ унафэщIым и къуэдзэ.
Щоджэн нэхъыжь Самохин Михаил – Псыхуабэ, Черкесск епархием и пресс-секретарыр.
Рахимов Мухаммад-Хьэжы – Ставрополь крайм и муфтийр.
Жмурко Юрий зэхыхьэм хэтхэм фIэхъус ярихащ икIи я мурад нэхъыщхьэм къытеувыIащ.
Виташов Дмитрий къыхигъэщащ дунейм щыIэ зэпыщIэныгъэхэр зыхуэдэр.
Рахимов Мухьэмэд-Хьэжы ягу къигъэкIыжащ щIэблэм я гупсысэр социальнэ сайтхэм яжь къызэрыщIихур.
Щоджэн нэхъыжь Самохин Михаил Псыхуабэ, Черкесск щIыналъэхэм я щихънагъ Феофилакт и цIэкIэ зэхуэсым хэтхэм фIэхъус ярихащ, терроризмым и щытыкIэхэр гъэкIуэдын зэрыхуейр къыхигъэщу, террорым и идеологием земыгъэужьынымкIэ, абы пэщIэтынымкIэ апхуэдэ зэхыхьэхэм я мыхьэнэр зэрыиныр къилъытащ.
Пленарнэ зэIущIэр езыгъэк1уэкIар КИФЩI-м и ИСТД-м дунейпсо экономикэмрэ таможеннэ IуэхумкIэ и кафедрэм и унафэщI Рудь Натальещ. Абы къыхигъэщащ дунейпсо терроризмым пэщIэтын папщIэ абы я идеологиемрэ ахъшэкIэ къызэгъэпэщынымрэ къызэпыудын зэрыхуейр.
УФ-м хамэ къэрал IуэхухэмкIэ и Министерствэм и Департаментым и къудамэм и унафэщI Поспелов Валерий пленарнэ доклад ищIащ, Урысейм терроризмым пэщIэтыным теухуауэ дуней псом щилэжь Iуэхугъуэхэм ехьэлIауэ.
Урысей Федерацэм финанс мониторгымкIэ и Федеральнэ къулыкъущIапIэм терроризмым ахъшэ хухэхыным пэщIэтынымкIэ и Управленэм и унафэщI Виташов Дмитрий доклад къеджащ финанс терроризмым пэщIэтынымкIэ дуней псом щыщхэр зэрызэдэлэжьэнум теухуауэ.
Тегеран и Дунейпсо факультетым и профессор, Ираным и щIэныгъ э Советым, Евразием и къэхутакIуэ Центрым (IRAS) хэт, урыс, евразие къэхутэныгъэ программэхэм я щIэныгъэ лэжьакIуэ Карами Джахангир и къэпсэлъэныгъэм кърихьэлIахэм щыдэгуэшащ Ираныр дунейпсо терроризмым зэрыпэщIэтым теухуа Iуэху бгъэдыхьэкIэхэмкIэ.
Пленарнэ зэIущIэхэр къызэхуэсахэм щIэщыгъуэ ящыхъуащ, зи гугъу ящIа Iуэху зэIумыбзхэр зэманым пэджэжырт.
Зэхуэсым и лэжьыгъэм пащащ къэпщытакIуэхэм я докладхэм къеджэу.
Зэхыхьэр зыхуэунэтIар щIалэгъуалэм хъыбар егъэщIэнымрэ егъэджэнымрэ я закъуэкъым, атIэ хамэ къэралхэм щыIэхэм, IэщIагъэлIхэм, нэгъуэщI къэралхэм щыIэ щIалэгъуалэ зэгухьэныгъэхэм къыхэжаныкIхэм хуаIэ пыщIэныгъэхэр гъэбыдэнырщ, публикэ дипломатием и Iэмалхэр терроризмым пэщIэтыным къыщагъэсэбэпынырщ.