2017 гъэм бадзэуэгъуэм и 8-м, фIэщхъуныгъэ зиIэ джыназхэу Муромскхэ Пётррэ Февронийрэ я фэеплъ махуэм, Псыхуабэ, Черкесск щIыналъэхэм я щихънагъ нэхъыщхьэ Феофилакт тхьэлъэIу литургие щригъэкIуэкIащ Кардоникскэ станицэм и Покров члисэм. Щоджэн нэхъыщхьэм къулыкъур драгъэкIуэкIащ Ипщэ Къэрэшей-Шэрджэс округым и щоджэнхэм благочиннэ щоджэн нэхъыжь Субтельный Евгений я пашэу. Къардэн къулыкъур иригъэкIуэкIащ щоджэн нэхъыжь Кубэ Димитрий.
Ектении нэужьым Пастыр нэхъыщхьэр Тхьэ елъэIуащ Украинэмрэ КъуэкIыпIэ Гъунэгъумрэ мамырыгъэ щызэфIэувэжын папщIэ. Литургиер и кIэм щынигъэсым, щихънагъ нэхъыщхьэм фIэщхъуныгъэ зиIэхэм узэщIыныгъэкIэ захуигъэзащ. ТхьэлъэIу нэужьым щихънагъ нэхъыщхьэ Феофилактрэ Зеленчукскэ муниципальнэ районым и администрацэм и Iэтащхьэ Самоходкин Сергейрэ щIыхь тхылъхэр яритащ илъэс 30-м щIигъукIэ зэбгъэдэса зэщхьэгъусэхэм. А махуэм, щоджэн нэхъыщхьэм Тхьэм папщIэ бэлыхь куэд зрагъэшэча Солунский Димитрий и фэеплъ члисэ Хасаут-Греческэ къуажэм щаухуэнум деж япэ мывэр щигъэтIылъащ. Къуажэдэсхэм я гуфIэгъуэр дагуэшыну зыкърагъэхьэлIащ Къэрэшей-Шэрджэсым и ЦIыхубэ зэхуэсым (Парламентым) и унафэщI Иуан Александр, республикэм и жылагъуэ зэгухьэныгъэхэм я лIыкIуэхэм, Зеленчукскэ районым и къэзакъ зэгухьэныгъэм щыщ къэзакъхэм, Хасаут-Греческэ къуажэм дэсхэм.
Щихънагъ нэхъыщхьэр къалэм илъэс ипэкIэ щыIащ, къуажэдэсхэр члисэщIэм и ухуэныгъэм арэзы техъуэну къыщелъэIуам, абыхэм я гъусэу щIыпIэр къыхихащ. Члисэр зэхэзехуэн щащIам члисэжьыр зэхакъутащ. ЧлисэщIэр иджырей щапхъэхэм тету яухуэнущ, илъэситIым къриубыдэу.
Щихънагъ нэхъыщхьэ Феофилакт псоми фIыщIэ яхуищIащ члисэ ухуэныгъэм хэлъхьэныгъэ хуэзыщIахэм икIи ХъыбарыфIхэр зэрыт тхылъ лъапIэр тыгъэ яхуищIащ. Щихънагъ нэхъыщхьэ Феофилакт япэ мывэр игъэтIылъа нэужь, ЦIыхубэ Зэхуэсым и унафэщIым и гъусэу къуажэм дэт алыдж щэнхабзэ музейм щыIахэщ.