УРЫСЕЙ ФСИН-м И управленэ Нэхъыщхьэу Къэбэрдей-Балъкъэр Республикэм щыӏэм видеоконференц жыпхъэм иту егъэджэныгъэ семинар щекӏуэкӏащ. Хэтахэр тепсэлъыхьащ шэч зыхуащӏхэр, ягъэкъуаншэхэр, суд зытращӏыхьахэр гъэзэкӏуэжынымкӏэ, жылагъуэм гъащӏэм хыхьэжынымкӏэ, псэкупсэ-щэнгъасэ щӏэныгъэ егъэгъуэтынымкӏэ дин лэжьакӏуэхэмрэ уголовнэ-гъэзэщӏакӏуэ системэм и лэжьакӏуэхэмрэ зэрызэдэлажьэм хэлъ щхьэхуэныгъэхэм.
Семинарым хэтащ урысей ФСИН-м и къудамэхэм я лэжьакӏуэхэр, тезырхэр щагъэзэкӏуэж ӏуэхущӏапӏэхэмрэ следственнэ изоляторхэмрэ фӏэщхъуныгъэ зиӏэхэм щадэлэжьэнымкӏэ жэуап зыхьхэр, суд зытращӏыхьахэм гъэсэныгъэ, социальнэ лэжьыгъэмкӏэ ӏэщӏагъэлӏхэр, психологие къулыкъущӏапӏэхэм я унафэщӏхэр.
Семинарым къыхыхьащ фӏэщхъуныгъэ зиӏэхэм ядэлэжьэнымкӏэ следственнэ изоляторым и унафэщӏым и дэӏэпыкъуэгъу, Налшык къалэм И Симеон члисэм и щоджэн иерей Тамбий Роман.