2026 гъэм фокӏадэм и 10-м Прималкинскэ жылэм Щекӏуэкӏащ Къэбэрдей-Балъкъэрым и Ӏэтащхьэ Коков Казбек Прохладнэ районым и активым зэрыӏущӏар. Зэӏущӏэм хэтащ Солдатскэ станицэм и Михайловскэ члисэм и унафэщӏ иерей Молдованов Евгений.
Хэтхэм районым мазиблым къриубыдэу и социально-экономикэ зыужьыныгъэм кърикӏуахэр зэхалъхьэжащ икӏи адэкӏэ я мурадхэм тепсэлъыхьащ.
Прохладнэ районым промышленнэ, мэкъумэш производствэм и куэдагъым щыхохъуэ. Иджыпсту мыбдеж инвестицэ проект 12 щагъэзащӏэ. Абыхэм ӏэмал къаритынущ зэпымыууэ лэжьапӏэ ӏэнатӏэу 307-рэ гъэм и лэжьапӏэ ӏэнатӏэу 250-рэ къызэрагъэпэщыну. Районым мэкъумэшыщӏэ фермер хозяйствэу, щхьэзакъуэ хьэрычэтыщӏэу 617-рэ щолажьэ, щхьэзакъуэ дэӏэпыкъуэгъу хозяйствэу мин 12,6-м щӏигъу щыӏэщ.
Социальнэ, коммунальнэ инфраструктурэм зегъэужьыным гулъытэ хэха хуащӏ. Къуажэ щӏыналъэхэм комплекснэу зегъэужьынымкӏэ программэмкӏэ Солдатскэ станицэм сабий садрэ еджапӏэрэ щаухуащ, еджапӏэщӏэхэр Прималкинскэмрэ Красносельскэмрэ къыщыунэхуащ. Еджапӏэхэр Щызэрагъэпэщыжащ Екатериноград, Благовещенкэ, Ново-Полтавэ, Солдатскэ. Благовещенкэ спорт комплексыр, Алтуд — щэнхабзэмкӏэ Унэр къыщагъэщӏэрэщӏэжащ. Районым и школхэм къыщызэӏуахащ «точка роста»центр 16.
2026 гъэм Алтуд, Псыншокъуэ, Мэз, Малакановскэ, Прималкинскэ дэт еджапӏэхэр къызыхуэтыншэу зэрагъэпэщыжыну я мурадщ. Районым и жылагъуэхэм псыкӏэ къызэзыгъэпэщ системэхэр къыщагъэщӏэрэщӏэж, гъуэгухэр щызэрагъэпэщыж, жылагъуэ щӏыналъэхэр зэӏузэпэщ щащӏ зэпытщ.
2021 гъэм къыщыщӏэдзауэ 2025 гъэ пщӏондэ районым щагъэтӏысащ аварийнэ фэтэр куэду зэхэт унэ 33-рэ. Псэупӏэщӏэ ягъуэтащ цӏыху 558-м.
Зэӏущӏэр щиухым цӏыхухэм упщӏэхэр иратащ районым и зыужьыныгъэм ехьэлӏауэ. Республикэм и ӏэтащхьэм жиӏащ зэрызыхуагъазэ псори лэжьапӏэ къызэращтэнур.