2026 гъэм бадзэуэгъуэм и 10-м Пятигорск и «ТАСС Кавказ» щӏыналъэ хъыбарегъащӏэ центрым щекӏуэкӏащ Кавказ Ищхъэрэ федеральнэ округым и щӏыналъэхэм иппотерапием зыщегъэужьыным теухуа пресс-конференц.
Реабилитацэм и унэтӏыныгъэщӏэхэм, СВО-м и ветеранхэм зэрадэлажьэм, сабийхэмрэ адэ-анэхэмрэ зэрыдэлажьэ программэхэм тепсэлъыхьащ иппотерапиемрэ адаптивнэ шы спортымкӏэ Лъэпкъ федерацэм и президент Денисенков Александр, «Дуней псом шуууэ» иппоцентрым и унафэщӏ Соловьевэ Наталье, «Ир» двигатель хабзэншагъэхэр зэгъэзэхуэжынымкӏэ Центрым и дохутыр нэхъыщхьэ Чеджемовэ Ноннэ, Пятигорск епархием иппотерапиемкӏэ и «Целебный Ессэнтӏыгу» Центрым и унафэщӏ иерей Тростинский Сергий сымэ.
Ди адэ Сергий къыджиӏащ фокӏадэм Ессэнтӏыгу зи узыншагъэм хэлъ цӏыхухэм адаптивнэ шы спортымкӏэ олимпиадэ щхьэхуэ зэрыщекӏуэкӏынур. Абы зэрыжиӏамкӏэ, центрым зыхуеину сертификацэр и кӏэм нигъэсащ икӏи илъэс къэс урысейпсо мардэм тет зэхьэзэхуэхэр къищтэну хуитыныгъэ игъуэтащ.
Апхуэдэу центрым и унафэщӏым къиӏуэтэжащ фокӏадэм и 13-м иппоцентрым урысейпсо спартакиадэ зэрыщекӏуэкӏынур.
Центрым и зы проектщ Кавказ Ищхъэрэм щыяпэ инклюзивнэ шы театрыр. Иджыпсту ӏэщӏагъэлӏхэм ар къызэӏухыным зыхуагъэхьэзырын яух. Гъэлъэгъуэныгъэхэм хэтыфынущ зи узыншагъэм сэкъат иӏэ сабийхэмрэ зауэм и ветеранхэмрэ.