Зеленчукскэ районым и администрацэм накъыгъэм и 18-м зэIущIэ щызэхэтащ къэблагъэ члисэ махуэхэр зэрагъэлъэпIэнум ехьэлIауэ. Зэхыхьэм хэтащ Ипщэ Къэрэшей-Шэрджэс члисэ округым и благочиннэ щоджэн Якушев Александр, Архыз Ищхъэрэ къуажэм Тхьэм и Уэхьий Михаил и цIэр зезыхьэ члисэм и унафэщI иеромонах Елевферий (Казаков), районым и Iэтащхьэ Брыкинэ Маринэ, Урысей МВД-м ОГИБДД-м и МО-м и «Зеленчукский» къудамэм и унафэщI, полицэм и майор Ключев Радмир, Зеленчукскэ районым и къэзакъ зэгухьэныгъэм и атаман Миронычев Виктор.
Зэӏущӏэм хэтахэр тепсэлъыхьащ телъыджэ къэзыгъэхъу Николай и фэеплъ махуэм Сторожевэ станицэм тахътэ махуэшхуэр зэрыщрагъэкӏуэкӏынум. А махуэм Сторожевскэ станицэ къэзакъ зэгухьэныгъэм и къэзакъхэм тхьэрыӏуэ ящӏынущ.
Апхуэдэу тепсэлъыхьащ мэкъуауэгъуэм и 1-м Архыз къуажэм щекӏуэкӏыну махуэшхуэ зэхыхьэхэм. А махуэм члисэм тхьэлъэӏу литургие щрагъэкӏуэкӏынущ. Хьэжыщӏ кӏуэ куэд къапоплъэ.
Зэӏущӏэм хэтахэм гулъытэ хэха хуащӏащ махуэшхуэ зэхыхьэхэм деж шынагъуэншагъэм, жылагъуэ хабзэр къызэгъэпэщыным, гъуэгум зэрыщызекӏуэр зэкӏэлъыгъэкӏуэным ехьэлӏа ӏуэхухэм. Полицэм и лэжьакӏуэхэр члисэхэм я гъунэгъумрэ къуажэхэм я бжэӏупэхэмрэ щыплъырынущ.
Районым и администрацэм, дин лэжьакӏуэхэм, полицэм, къэзакъхэм зэрыдэлажьэр сэбэп хъунущ члисэ гуфӏэгъуэхэр мамыру икӏи шынагъуэншэу егъэкӏуэкӏынымкӏэ.