Егъэджэныгъэм зегъэужьынымкӏэ, щӏэныгъэм хэгъэхъуэнымкӏэ, егъэджакIуэхэм я щIэныгъэм хэгъэхъуэнымкIэ Ставрополь крайм и институтым щекIуэкIащ «Егъэджакӏуэм и щэнхабзэ лӏыгъэм папщӏэ» XXI урысейпсо зэпеуэм и хэгъуэгу ӏыхьэр. Зэпеуэр теухуащ зи ныбжьыр илъэс 20 иримыкъуа сабийхэмрэ щӏалэгъуалэмрэ педагогикэм, гъэсэныгъэм и IуэхукIэ ядэлэжьэным.
Зэпеуэм къыӏэрыхьащ цӏыху 56-м къабгъэдэкӏ лэжьыгъэ 46-рэ. КъэпщытакIуэ гупым хэтхэм проект нэхъыфӏи 9 къыхахащ.
Гран-при саугъэтыр иратащ Ставрополь и Промышленнэ районым школщӏыб лэжьыгъэмкӏэ и центрым и егъэджакӏуэ-къызэгъэпэщакӏуэ Сергеевэ Ларисэрэ Пятигорск къалэм и школ №5-м тхыдэмкIэ и егъэджакIуэ Арушанян Маринэрэ. Текӏуахэр унэтIыныгъиплӏкӏэ яубзыхуащ.
«Егъэджэныгъэ зэгухьэныгъэм псэкупсэ-щэнгъасэ къызэрыщызэрагъэпэщам папщӏэ» унэтӏыныгъэм щытекӏуащ Труновскэ округым и сабий гъэсапӏэм и гупымрэ Кисловодск щыщ школым и унафэщӏымрэ.
«Методикэ зыужьыныгъэ нэхъыфӏ» унэтӏыныгъэм щытекIуащ Александровскэ районым щыщ автор гупымрэ Пятигорскэ епархием и чристэн гимназием макъамэмкӏэ и егъэджакӏуэмрэ.
«Псэкупсэ-щэнгъасэ, граждан-хэкупсэ гъэсэныгъэм и программэ лей нэхъыфӏ» унэтӏыныгъэм къыщыхагъэщащ Невинномысск къикӏа библиотекэм и унафэщӏымрэ къэзакъ школым чристэн щэнхабзэм и лъабжьэхэм я егъэджакӏуэхэмрэ.
«Илъэсым и егъэджэныгъэ тхылъ тедзапӏэ проект нэхъыфӏ» унэтӏыныгъэм саугъэт къыщихьащ Георгиевскэ епархием и Буденновскэ районым щыщ пэщӏэдзэ классхэмкӏэ егъэджакӏуэм. Абы тхылъ-лэч зыбжанэ къигъэлъэгъуащ.
Зэпеуэм щытекӏуахэм, къыщыхэжаныкӏахэм, абы хэтахэм яхуэфащэ ехъулӏэныгъэхэмкӏэ ехъуэхъуащ икӏи тхьэм дэӏэпыкъуну, творческэ ехъулӏэныгъэхэр яӏэну, сабийхэмрэ щӏалэгъуалэмрэ псэкупсэ-щэнгъасэ гъэсэныгъэм и ӏуэхукӏэ проектыщӏэхэр яӏэну ехъуэхъуащ.