2026 гъэм накъыгъэм и 11-м Пятигорскрэ Черкесскрэ я архиепископ Феофилакт и нэфӏ зыщыхуа Архыз Ищхъэрэ къуажэм и Георгиевскэ члисэм япэу щекӏуэкӏащ «Pente oros» ансамблым и Ӏутӏыж концерт.
Щэнхабзэ ӏуэхугъуэр даӏыгъащ Кавказ Ищхъэрэм щыӏэ Алан чристэн щэнхабзэ-тхыдэ музей-заповедникымрэ Тхьэм и бегъымбар Архыз Ищхъэрэ къуажэм Илия и цIэкIэ щыIэ члисэмрэ.
X лӏэщӏыгъуэм дращӏея Георгиевскэ члисэр Урысейм и щӏыналъэм и нэхъ пасэрей члисэхэм хабжэ. Археологхэм ар Алан епархием и кафедральнэ члисэ зэхуэхьэсауэ къалъытэ. Абы и ухуэныгъэм архитектурэ ӏэмал телъыджэхэр къыщагъэсэбэпащ, абыхэм я фӏыгъэкӏэ члисэм акустикэ гъуэзэджэ иӏэщ. Лӏэщӏыгъуэ куэдым къриубыдэу япэу пасэрей блынхэм къыщыӏуащ псэкупсэ макъамэм и концерт.
«Pente oros» ансамблыр Санкт-Петербург, Москва духовнэ академиехэр къэзыуха цӏыхуибл мэхъу. «Pente oros» фӏэщыгъэр — алыджыбзэкӏэ «бгитху» зэдзэкӏауэ, Пятигорск къалэм теухуащ. Абы хэт псори Пятигорск епархием и регент лажьэхэмрэ члисэ уэрэджыӏакӏуэхэмрэ ящыщщ.
Гупыр 2021 гъэм къызэрагъэпэщащ. А зэманым къриубыдэу ансамблыр мызэ-мытӏэу хэтащ архиерей тхьэлъэӏухэм, члисэхэм я утыкухэм концертхэр щитащ, Кавказым и Минеральнэ Псыхэм и къалэхэм махуэшхуэхэм зыкъыщигъэлъэгъуащ.
Къэпсэлъэныгъэм едэӏуэну къызэхуэсащ Къэрэшей-Шэрджэсым и члисэхэм екӏуалӏэхэмрэ республикэм и хьэщӏэхэмрэ. Хьэщӏэхэм фӏэхъус ирахащ Архыз Ищхъэрэ къуажэм и Ильинскэ члисэм и унафэщӏ иеромонах Елевферийрэ (Казаков) члисэ уэрэд жыӏэнымрэ щэнхабзэмкӏэ епархием и къудамэм и унафэщӏ, Москварэ Урысей псомрэ я Патриархым деж урыс члисэ уэрэд жыӏэным зегъэужьынымкӏэ щыӏэ Члисэ-жылагъуэ советым хэт протоиерей Кузнецов Сергийрэ.
Программэм къыщыӏуащ тхьэлъэӏу, псэкупсэ тхыгъэхэр — Ӏутӏыжым и тропархэр бзэ пщыкӏутӏкӏэ - пасэрей арамеибзэм щыщӏэдзауэ иджырей китаибзэм нэс, Куржы Члисэм и уэрэдхэр, Антипасхирэ Мироносицхэм я щхьэгъусэхэмрэ я тхьэмахуэхэм я стихирхэр, Рахманинов Сергейрэ Юнек Еленэрэ я ӏэдакъэщӏэкӏхэр.
Концертыр щэнхабзэ ӏуэхугъуэ щхьэхуэ хъуащ, чристэн хабзэхэмрэ уэрэджыӏакӏуэ щэнхабзэ къулеймрэ Кавказ угъурлым щыхъумэныр диӏыгъауэ.