Кисловодск къалэ-зыгъэпсэхупIэм щиIэ ЗАГС-м и къудамэм Урысейм щыпсэу лъэпкъхэм я зэкъуэтыныгъэр зэхыхьэ дахэкIэ къыщызэIуахащ. КъалъхугъащIэ Слипченкэ Маринэ и адэ-анэм кисловодскдэс цIыкIум, мазаем и пэхэм къалъхуам и япэ тхылъыр иратыжащ.
Адэ-анэм хъуэхъукIэ зыхуагъэзащ Пятигорск епархием Кисловодск щиIэ округым и благочиннэ щоджэн нэхъыжь Знаменский Иоанн. Щоджэныр къалъхугъащIэм ехъуэхъуащ икIи жиIащ сабийр умэхъын ящIын папщIэ члисэм зэрахьынур быдэу и фIэщ зэрыхъур. Благочиннэм къыбгъэдэкIыу сабийм и адэ-анэ Слипченкэ Егоррэ Александррэ тыгъэ хуащIащ Тхьэм папщIэ бэлыхь куэд зрагъэшэча Маринэрэ Укъэзыхъумэ МелыIычымрэ я теплъэхэр.
Адэ-анэм хъуэхъукIэ зыхуагъэзащ Кисловодск къалэм и «Славяне» зэгухьэныгъэм и унафэщI, Ставрополь крайм лъэпкъ политикэмрэ къэзакъхэм я IуэхухэмкIэ и Министерствэм и деж щыIэ жылагъуэ советым и унафэщI Савельев Владимир. Абы къыхигъэщащ Урысейм сабий къызэрыщалъхуар зэрыгуфIэгъуэр псом ди дежкIи. Адэ-анэм щIакхъуэ, шыгъу, саугъэт тыгъэ хуащIурэ, Владимир абыхэм я унагъуэр мамырыну ехъуэхъуащ.
Къызэралъхуам щыхьэт техъуэ тхылъымрэ саугъэтхэмрэ яритащ Кисловодск къалэ думэм и УнафэщI Волошинэ Любовь. Зэхуэсахэм хъуэхъукIэ захуигъэзащ Ставрополь крайм и Думэм и депутат Мурашко Николай, фэеплъ саугъэтхэр зытар.