Гъэ къэс ЕссэнтIыгу къалэм и Петропавловскэ члисэ комплексым и Iэгъуэблагъуэм щокIуэкI Кавказым исхэр щIыналъэ лъапIэм Тхьэ щелъэIун махуэшхуэр. Гъэ къэс махуэшхуэр нэхъри щIэщыгъуэ мэхъу.
Мы гъэм щIышылэм и 8-м ар къызэIуахащ IэпщIэлъапщIэхэм я IэрыкIхэм я гъэлъэгъуэныгъэкIэ. КъыкIэлъыкIуэу махуэшхуэ программэр ирагъэжьащ. ХьэщIэхэм фIэхъус ярихащ унафэщI щоджэн Гриценкэ Виталий, къалэ думэм и депутат Кириакиди Марие, «Кавказский Паломник» ПС-м и унафэщI Логвиненкэ Ларисэ.
Концертыр къызэIуихащ тхьэмахуэ школым и гъэсэнхэу Святкинэ Еленэрэ Шепиловэ Леонсиерэ, хъуромэ уэрэдхэр жиIэри. ХьэщIэхэм я пащхьэм зыкъыщагъэлъэгъуащ «Казачья душа» цIыхубэ ансамблым, Пятигорск къалэм и Спасскэ кафедральнэ соборым и щоджэнхэм, «Пенте Орос» цIыхубз ансамблым, «Понтос» алыдж диаспорэм и гупым.
Махуэшхуэм хэтахэм я пащхьэм щагъэлъэгъуащ тхакIуэ Сытник Верэ и Iэдакъэ къыщIэкIа Петропавловскэ комплексым и гъуэгугъэлъагъуэр. ХьэщIэхэм Iэнэ къыхуащтащ.
Кавказым и паломникым и махуэр къызэзыгъэпэщахэм фIыщIэ хуащIащ къалэ администрацэм, Петропавловскэ члисэ комплексым, къазэрыдэIэпыкъуам, хьэщIэхэм гулъытэ къызэрыхуащIам папщIэ.