2025 гъэм дыгъэгъазэм и 16-м Пятигорск щекIуэкIащ КИФЩI-м и члисэ хорхэм я уэрэджыIакIуэхэмрэ регентхэмрэ я VIII конференцэр. УэрэджыIакIуэ 200-м щIигъу щызэхуэсащ Спасскэ кафедральнэ соборым. Абы тхьэлъэIу литургие щригъэкIуэкIащ Пятигорск, Черкесск щIыналъэхэм я архиепископ Феофилакт, Пятигорск епархием и щоджэнхэмрэ зэхуэсым и щоджэнхэмрэ я гъусэу.
Хорыр зэригъакIуэурэ, конференцэм хэтхэм папщIэ мастер-класс итащ Москварэ Урысей псомрэ я Патриархым урыс члисэ уэрэдхэм зегъэужьынымкIэ и деж щыIэ Члисэ-жылагъуэ советым и секретарь, Урыс Чристэн члисэм и сабий хорым и унафэщI икIи и къызэгъэпэщакIуэ, Радонижский Сергий и цIэр зезыхьэ члисэм и «Артос» хорым и регент Волковэ Варварэ.
Варварэ сабий хорхэм я гъусэу хъуромэ колядкэхэр зэригъэщIащ. ХьэщIэм къыхигъэщащ зэхуэсым и мыхьэнэр зэрыиныр. Мастер-классым хэт ныбжьыщIэхэм фIэхъус ярихащ архиепископ Феофилакт. Епархием и гуп нэхъыфIхэр, нэгъаби хуэдэу, Урыс чристэн члисэм и сабий хорым хэтыну Iэмал яIэщ.
Конференцэр архиепископ Феофилакт и арэзыныгъэкIэ ирагъэкIуэкIыр 2016 гъэ лъандэрэ. Зэхуэсыр илъэс зэхуэмыдэхэм ирагъэкIуэкIащ икIи абы хэтащ Москварэ Урысей псомрэ я Патриархым и деж урыс члисэ уэрэдхэм зегъэужьынымкIэ щыIэ Члисэ-жылагъуэ советым и унафэщI, щоджэн нэхъыжь, Тверскрэ Кашинскрэ я митрополит Амвросий, «Содействие» Чристэн гуманитарнэ университетым и регент, уэрэджыIакIуэ факультетхэм я декан Кустовский Евгений, Санкт-Петербург и духовнэ академием щэнхабзэмкIэ и проректор, регент къудамэм и унафэщI Гундяевэ Еленэ.
Конференцэр иджыпсту Iуэху зэIумыбзхэм щытепсэлъыхь зэхуэсщ, члисэ уэрэдхэр жыIэнымрэ Кавказ Ищхъэрэм щэнхабзэ хорым зыщегъэужьынымкIэ унэтIыныгъэщ.