Пятигорск епархием и щоджэнхэр щыIащ «Разговоры о важном» дерсым. Ар теухуауэ щытащ Хэкум и хъумакIуэхэм я махуэм.
Быкогоркэ къуажэм и курыт еджапIэ №16-м, махуэшхуэм и мыхьэнэм теухуауэ еджакIуэхэм щепсэлъащ щоджэн Пронь Алексий. Ар тепсэлъыхьащ щапхъэхэм, цIыхум и къэралыр фIыуэ щIилъагъум, я къалэныр щагъэзащIэм, Тхьэм хуаIэ лъагъуныгъэр щагъэнаIуэм теухуауэ. Тхыдэ къэхъугъэхэмкIэ щIигъэбыдэжащ лIыгъэм теухуауэ зи гугъу ищIахэр: Невский Александр, Московский Даниил, ТекIуэныгъэ къэзыхьа Георгий, Ушаков Федор.
Суворовскэ станицэм и школ №2-м а махуэм къыщызэIуахащ курыт еджапIэ №12-м и еджакIуэхэм я фэеплърэ школ музейрэ, еджакIуэ-дзэ Iуэху хэхам хэтахэм я фэилъхьэгъуэхэр, зауэлI-афганецхэм я хьэпшыпхэр щахъумэу. Зэхыхьэм хэтащ еджакIуэхэр, дзэ Iуэху хэхам хэтахэр, хэкIуэдахэм я благъэхэр. Школым и армеец ныбжьыщIэхэр къытеувыIащ сабиигъуэм, гъащIэм и щIэдзапIэм, я ехъулIэныгъэхэм, Блыным зи цIэ иратхахэм. Щихъхэу Верэ, Надеждэ, Любовь, абыхэм я анэ Софие я цIэр зэрихьэу станицэм щыIэ члисэм и унафэщI щоджэн нэхъыжь Иванилов Роман ягу къигъэкIыжащ зауэлI, офицер лIыхъужьхэм я фэеплъыр хъумэныр дэтхэнэми и къалэну зэрыщытыр.
ЕссэнтIыгу къалэм и школ №5-м и еджакIуэхэм «История Героев» Iуэхум хыхьэу IущIащ Пятигорск епархием ЕссэнтIыгу щиIэ округым и благочиннэ щоджэн нэхъыжь Фещенкэ Стефан. Щоджэныр ныбжьыщIэхэм яхутепсэлъыхьащ Хэкум и хъумакIуэхэм я щIэинхэм икIи къыхигъэщащ «ди лъэпкъым и псэкупсэ къарумрэ Хэкум и хъумакIуэхэмрэ чристэн фIэщхъуныгъэмрэ Хэку лъагъуныгъэмрэ сыт щыгъуи ящIыгъуу къызэрекIуэкIар». ЕджакIуэхэм упщIэхэр ятащ, я Iуэху еплъыкIэхэмкIэ зэдэгуэшащ, иджырей зэманым лIыхъужьу ущытыным и мыхьэнэм теухуауэ.
Хэкум и лIыхъужьхэм я махуэм ирихьэлIэу Черкесск къалэм и Никольскэ соборым зыщаплъыхьащ. Члисэм щыIащ Даур Аслъэн и цIэр зезыхьэ щэнхабзэмрэ гъуазджэмкIэ колледжым, Ставрополь крайм и зыплъыхьакIуэхэмрэ Урысейм и Социальнэ фонд Къэрэшей-Шэрджэсым щыIэм и лэжьакIуэхэмрэ. «Царьград» щIыналъэ къудамэм и унафэщI Струговцев Денис тепсэлъыхьащ Къэрэшей-Шэрджэсым и лIыхъужьхэм, «Специальная военная операция» выставкэм хагъэхьа хьэпшыпхэм иригъэплъащ. Соборым и щоджэн Гурин Александр члисэм зыщригъэплъыхьащ.