Къэрэшей-Шэрджэсым и къалащхьэм IX Сабий Сергиевскэ къеджэныгъэхэр щызэхуащIыжым хыхьэу щагъэлъэпIащ сочиненэ тхынымкIэ «Моя дружная семья» зэпеуэм щытекIуахэр гъэлъэпIэныр. Мы гъэм зэхьэзэхуэм лэжьыгъэ 70 ягъэхьащ, унагъуэм и лъапIэныгъэхэр я лъабжьэу.
Зэпеуэр «Наша дружная семья: уроки семейной медиации» Iуэхум щыщ Iыхьэщ. Ар егъэзащIэ Черкесск къалэм Тхьэм и Анэм и Покров члисэм и екIуэлIапIэм. Зэпеуэм щытекIуахэу Акъ Роман, Турклиевэ Аланэ, Мелекаев Къурмэн – игъэлъэпIащ Покров члисэм и щоджэн Якушев Игорь. НыбжьыщIэхэм щIыхь тхылъхэмрэ «Разговоры о важном» унагъуэ стIолыщхьэ джэгукIэхэмрэ тыгъэ хуащIащ.
«Дэтхэнэ зы сочиненэри – щыхьэт тохъуэр сабийхэм я унагъуэр, лъагъуныгъэр зэрызыхащIэм. А лэжьыгъэхэм жылагъуэм и лъабжьэ лъапIэныгъэхэр дигу къагъэкIыж. НыбжьыщIэхэм, я егъэджакIуэхэм, адэ-анэхэм фIыщIэ яхуэсщIыну сыхуейщ сабийхэм папщIэ яухуэ дуней дахэм папщIэ», - къыхигъэщащ щоджэн Якушев Игорь.
Фигу къэдгъэкIыжынщи, «Наша дружная семья: уроки семейной медиации» Iуэхур щытекIуащ «Православная инициатива» грант зэхьэзэхуэм. Ар къыщIыхалъхьам и щхьэусыгъуэр унагъуэм щыIэ мыхъумыщIагъэхэр гъэкIуэдынырщ, лъапIэныгъэхэр гъэбыдэнырщ. Медиацэм цIыху 45-рэ хуеджащ, зэгурымыIуэныгъэ зи зэхуаку дэлъ унагъуэхэм дэIэпыкъуэгъу яхуэхъун папщIэ.