Мы махуэхэм Кисловодск и «Крепость» лъахэхутэ музейм щагъэлъэпIащ ар илъэс 60 зэрырикъур. Гупым ехъуэхъуну кIуащ къалэм и музейхэм я лэжьакIуэхэр, лъахэхутэхэр, тхыдэджхэр, къалэ-зыгъэпсэхупIэм и Думэм и УнафэщI Волошинэ Любовь, Кисловодск члисэ округым и благочиннэ щоджэн нэхъыжь Знаменский Иоанн.
Благочиннэр ехъуэхъуащ музейм и унафэщI Лузин Сергейрэ абы и лэжьакIуэхэмрэ. Зэхуэсахэм защыхуигъазэм, Иоанн къыхигъэщащ нобэ музейр тхыдэ артефактхэм къадэкIуэу псэкупсэ-узэщIыныгъэ центру зэрыщытыр. Музейхэм я лэжьакIуэхэри, Члисэм и лIыкIуэхэри цIыхухэм хуолажьэ, цIыхухэр яузэщIыну, гуапагъэмрэ щIэныгъэмрэ хуаунэтIыну я ужь итхэщ.
Щоджэныр музейм и лэжьакIуэхэм ехъуэхъуащ дяпэкIи заужьыну, Тхьэр къадэIэпыкъуну, Ставрополь теухуа тхыдэ тхылъхэр тыгъэ яхуищIащ, Пятигорск, Черкесск щIыналъэхэм я архиепископ Феофилакт и «Пару минут о вечном» тхылъыр музейм и унафэщIым тыгъэ хуищIащ.