2025 гъэм жэпуэгъуэм и 24-м Минераловодскэ муниципальнэ щIыналъэм ЩэнхабзэмкIэ и унэм къэзакъ щэнхабзэмкIэ «Между Кум-то реки, между Тереком» фестиваль-зэпеуэр щекIуэкIащ. Ар траухуащ тхакIуэ Губин Андрей къызэралъхурэ илъэс 98-рэ зэрырикъум.
IуэрыIуатэ махуэшхуэм щызэхуэсащ Къэбэрдей-Балъкъэрым, Кисловодск, Лермонтов, Минводы щыщ цIыху 200-м щIигъу. Усэрэ прозэрэ къеджэнымкIэ зэпеуащ, къэзакъ уэрэдхэр ягъэзэщIащ, видеонэтынхэр ягъэхьэзыращ къэзакъ тхыдэм теухуауэ. КIэух концерти ятащ абдеж.
Фестивалым хэтхэмрэ абы и хьэщIэхэмрэ фIэхъускIэ захуигъэзащ Пятигорск, Черекесск щIыналъэхэм я архиепископ Феофилакт. Абы къыхигъэщащ артистхэм зэрызагъэхьэзырар, къэзакъ тхыдэмрэ щэнхабзэмрэ хъумэнымкIэ абы мыхьэнэшхуэ зэриIэр.
Зэхыхьэм хэтахэм саугъэтхэр яритащ Пятигорск епархием къэзакъхэм ядэлэжьэнымкIэ и къудамэм и унафэщI щоджэн нэхъыжь Фещенкэ Стефан, Тэрч къэзакъ зэгухьэныгъэм и унафэщI Губенкэ Олег.