Черкесск щекIуэкIащ сурэт щIынымкIэ сабийхэм папщIэ къызэрагъэпэща «Моя дружная семья» республикэпсо зэпеуэм щытекIуахэр щагъэлъапIэ зэхыхьэ. Ар теухуауэ щытащ унагъуэм и лъапIэныгъэхэм, хабзэм. Зэпеуэм зэхуишэсащ Черкесск къалэм и тхьэмахуэ школхэм я художник ныбжьыщIэхэм я лэжьыгъи 116-рэ.
КъэпщытакIуэ гупым хэтхэм цIыхуий текIуауэ къагъэлъэгъуащ – курыт еджапIэхэм щеджэхэу: Ткачёвэ Вероникэ, Азовэ Бэллэ, Арслановэ Зульфия, Нестеренкэ Викторие, Чичханчиевэ Элинэ, Кубанов Амид, Голаевэ Азалие, Хъупсырокъуэ Бэллэ. Дэтхэнэми саугъэт лъапIэхэр къыхуагъэфэщащ. Зэпеуэм хэтахэми щIыхь тхылъхэр иратащ.
ТекIуахэр щагъэлъэпIащ КъШР-м и Жылагъуэ палатэм. Дамыгъэхэр иратащ палатэм и унафэщI Ляшовэ Еленэрэ Пятигорск епархием и Ищхъэрэ Къэрэшей-Шэрджэс округым и благочиннэ щоджэн нэхъыжь Нартов Александр.
Зэпеуэр къызэрагъэпэщащ «Моя дружная семья: уроки семейной медиации» Iуэхум хыхьэу.
«Унагъуэхэм я дэIэпыкъуэгъу Iуэхущ длэжьыр. Ди мурадыр зытеухуар унагъуэхэм гугъуехьхэр къызэранэкIынырщ, быдэ хъунырщ, мылъэлъэжынырщ. Мазищым къриубыдэу IэщIагъэлI 45-рэ – медиаторхэр ирагъэджащ, зэгурыIуэ яку дэлъыным, зэкIужыным теухуа лэжьыгъэ зыщIэхэр. Iуэхум хыхьэу унагъуэ фестиваль ин ирагъэкIуэкIащ, сурэт щIынымкIэ сабийхэм я зэпеуи хыхьэу. Республикэм и администрацэмрэ Черкесск къалэм и унафэщIхэмрэ фIыщIэ худощI къызэрыддэIэпыкъуамрэ унагъуэр гъэбыдэным гулъытэ зэрыхуащIымрэ папщIэ», - жиIащ благочиннэм.
Фигу къэдгъэкIыжынщи, «Моя дружная семья: уроки семейной медиации» Iуэхур щытекIуащ «Православная инициатива» зэпеуэм икIи ар егъэзащIэ Черкесск къалэм и Покров члисэм. Ар хуэунэтIащ унагъуэм илъ зэгурымыIуэныгъэхэр къэмыгъэхъуным, зэпэщIэтIыныгъэхэм хэкIыпIэ къыхуагъуэтыным, унагъуэм и хабзэхэр ягъэбыдэным, медиацэ IэщIагъэлIхэр ягъэхьэзырыным. Iуэхум хыхьэу медиацэм цIыху 45-рэ хурагъэджащ.