Пятигорск, Черкесск щIыналъэхэм я архиепископ Феофилакт и арэзыныгъэкIэ, 2025 гъэм гъатхэпэм и 27-м щоджэн нэхъыжь Бондарчук Андрей хэтащ мыкоммерцэ IуэхущIапIэхэм ядэлэжьэнымкIэ Совет УФ-м и Минюстым щиIэ управленэ нэхъыщхьэм Ставрополь крайм щиIэ къудамэм и деж щыIэм и зэIущIэм. Зэхыхьэр Ставрополь къалэм ЮстицэмкIэ и министерствэм и управленэ нэхъыщхьэм щызэхэтащ. Ар иригъэкIуэкIащ УФ-м ЮстицэмкIэ и министерствэм и управленэм Ставрополь крайм щиIэ къудамэм и унафэщIым и къуэдзэ Романов Роман. ЗэIущIэм щыжаIащ министерствэм нэгъабэ иригъэкIуэкIа къэпщытэныгъэхэр зыхуэдэр. Ставрополь крайм мыкоммерцэ IуэхущIапIэ 3000 щыIэщ. Абы щыщу 500-р - дин, 160-р - къэзакъ IуэхущIапIэхэщ. Гъэ кIуам и дыгъэгъазэ мазэ лъандэрэ ЮстицэмкIэ министерствэм и порталыщIэр мэлажьэ. Абы хъыбарыщIэхэм ущыкIэлъыплъ мэхъу. Министерствэм и лIыкIуэм чэнджэщ итащ IуэхущIапIэм гулъытэ нэхъыбэ хуащIыну икIи щIэхэм зыхагъэгъуэзэну. Зэхыхьэр щиухым абы щыжаIахэр зэхалъхьэжащ икIи дяпэкIэ къапэщылъхэр щаубзыхуащ.