2024 гъэм жэпуэгъуэм и 25-м Минводы, Минераловодскэ округым ЩэнхабзэмкIэ и унэм, Пятигорск, Черкесск щIыналъэхэм я архиепископ Феофилакт и арэзыныгъэкIэ, Губиным и XI «Между Кум-то реки, между Тереком» къеджэныгъэхэр зэхэтащ. Къэзакъ щэнхабзэмкIэ зэпеуэ-фестивалыр траухуащ къэзакъ тхакIуэ Губин Андрей къызэралъхурэ илъэс 97-рэ зэрырикъум. Ар Пятигорск епархиемрэ къэзакъ щэнхабзэр фIыуэ зылъагъу Тэрч зэгухьэныгъэмрэ я зэдай Iуэхущ. КъызэгъэпэщакIуэхэм я цIэкIэ зэхуэсахэм захуигъэзащ «Терское общество любителей казачьей старины» фондым и унафэщI Губенкэ Олег, къызэгъэпэщакIуэхэм ящыщ Ипщэ Къэрэшей-Шэрджэс округым и благочиннэ щоджэн нэхъыжь Субтельный Евгений.
Тэрч, Кубань къэзакъыдзэхэм я Iэгъуэблагъэм щыщ цIыхуи 170-м я зэфIэкIхэр щагъэлъэгъуащ «Театральная постановка», «Казачья песня», «Художественное слово», «Видеоролик» Iыхьэхэм. Зэпеуэ-фестивалым кърикIуахэр щыжаIащ кIэух концертым хыхьэу. Саугъэт нэхъыщхьэр цIыху 28-м къахьащ, I нагъыщэм и лауреат цIыхуи 10 хъуащ. Абыхэм иратащ архиепископ Феофилакт и Iэ зыщIэлъ щIыхь тхылъыр. Ар яритыжащ Пятигорск епархием къэзакъхэм ядэлэжьэнымкIэ и къудамэм и унафэщI щоджэн нэхъыжь Фещенкэ Стефан.
А махуэ дыдэм Минводы щоджэн нэхъыжь Фещенкэ Стефан къэзакъ зэгухьэныгъэхэм я щоджэнхэм зэIущIэ щадригъэкIуэкIащ Пятигорск епархием. Ахэр тепсэлъыхьащ Тэрч къэзакъыдзэм и конференцэм зыхуэгъэхьэзырыным, Новопавловск щэкIуэгъуэм и 19-м къыщызэрагъэпэщыну яубзыхуам. Апхуэдэу къытеувыIащ 2025 гъэм Москва щIышылэм щызэхэтыну Дунейпсо Хъуромэ къеджэныгъэхэм и къэзакъ унэтIыныгъэм зэрыхэтынум.