2024 гъэм жэпуэгъуэм и 9-м ТАСС Кавказ хъыбарегъащIэ центрым щекIуэкIащ Пятигорск, Черкесск щIыналъэхэм я архиепископ Феофилкт и пресс-конференцэ. ХъыбарегъащIэ агентствэм и къудамэ къыщызэIуахащ КИФЩI-м и къалащхьэм мазэ зыбжанэ и пэкIэ. Архиепископ Феофилакт япэ дин пашэ щыхъуащ абы, агентствэм и журналистхэм я жэрдэмкIэ абы ирагъэблагъэри. «Благословенный Кавказ» выставкэр ЕссэнтIыгу жэпуэгъуэм и 11-м щыщIэдзауэ 17 пщIондэ зэрыщекIуэкIынурщ ар зытеухуауэ щытар.
Пресс-конференцэм хэтащ федеральнэ, дин, хъыбарегъащIэ IуэхущIапIэхэм я лIыкIуэхэр. ТАСС-м и сайтымрэ хъыбарегъащIэ агентствэм и соцсетхэмкIэ къатащ ар зэрекIуэкIыр. «Благословенный Кавказ» чристэн выставкэрщ ар зытеухуауэ щытар. Члисэ хьэпшыпхэр, саугъэтхэр, тхьэнапэхэр, ерыскъыпхъэхэр щагъэлъагъуэ абы. ЖармыкIэм щIыгъуу «Радость слова» тхылъ гъэлъэгъуэныгъэри абы щокIуэкI.
Журналистхэр зыщIэупщIахэм ящыщщ чристэн IуэхущIапIэм и лэжьыгъэхэр, чристэн егъэджэныгъэр, Пятигорск епархием и социальнэ Iуэхухэр. Нэхъыбэу зи гугъу ящIар дзэ Iуэху хэхам хэтхэм ядэIэпыкъунырщ.
Журналистхэм епсэлъэн щаухым, Пастыр нэхъыщхьэм ахэр къыхуриджащ социальнэ Iуэху къыхилъхьар къыдаIыгъыну: «ДэIэпыкъуныгъэ хуэныкъуэхэм папщIэ унэ сыухуэну сыщIохъуэпс. Хоспис сыухуэну сыхуейщ. Ди зэхуэзэныгъэр къэзгъэсэбэпу, ныбжьэгъухэр, дэIуэгъухэр диIэну сыхуейщ. ЦIыхухэм дадэIэпыкъун, щапхъэу ди гъащIэр етхьэкIын хуейщ. Хуэныкъуэхэм ядэIэпыкъуным и мызакъуэу, цIыхухэм гуапагъэм хуагъэушынущ абы и фIыгъэкIэ», - жиIащ абы.