Пятигорск и лъахэхутэ музейм щыпащэ «Пятигорский Афон» выставкэм. Ар теухуащ Успенскэ Второафонскэ Бештаурскэ цIыхухъу къулъшырыфыр къызэрызэIуахрэ илъэси 120-рэ зэрырикъум.
Зэхуэсахэм фIэхъускIэ захуигъэзащ музейм и унафэщI Золотаревэ Юлэ, выставкэр къызэзыгъэпэщахэм фIыщIэ тхылъхэр езытам. Апхуэдэу зэхыхьэм хэтхэм фIэхъус ирахащ Пятигорск члисэ округым и благочиннэ щоджэн нэхъыжь Симанович Олегрэ къулъшырыфым и унафэщI игумен Михаилрэ (Гичко).
ЗэIущIэм хэтащ иеромонах Елевферий (Казаков), Пятигорск епархием щихъхэр канон щIынымкIэ и комиссэм и унафэщI, сурэт гъэлъэгъуэныгъэр къызэзыгъэпэщахэм ящыщыр.
Духовнэ уэрэдхэр ягъэзэщIащ Пятигорск и Спасскэ кафедральнэ соборым и Архиерей хор Кубэ Аннэ и унафэм щIэтым.
Выставкэр къызэрагъэпэщащ илъэс зыбжанэ хъуауэ къулъшырыфымрэ музеймрэ зэрызэдэлажьэм я фIыгъэкIэ. Проектым тепсэлъыхьащ щIыуэпсымрэ археологиемкIэ секторым и унафэщI Савенкэ Сергей, Второафонскэ къулъшырыфым и благочиннэ иеромонах Иоанн (Галумов).
Проектым щыщ Iыхьэщ Дегтев Алексей и сурэт гъэлъэгъуэныгъэр, илъэс зыбжанэ хъуауэ къулъшырыфым и гъащIэр а сурэтхэмкIэ къэзыгъэлъагъуэр.
Зэхыхьэр щиухым Сергей зэхуэсахэм заригъэплъыхьащ. Выставкэр щэкIуэгъуэм и 12 пщIондэ лэжьэнущ.