Терроризмым пэщIэтыным и махуэм, 2024 гъэм фокIадэм и 3-м, Пятигорск епархием Кисловодск округым щиIэ благочиннэ щоджэн нэхъыжь Знаменский Иоанн фэеплъ пэкIум къыщыпсэлъащ терракт къыщыхъуауэ щыта Подкумок-Белый Уголь гъущI гъуэгум деж. Фэеплъым деж щызэхуэсащ Кисловодск къалэм и Iэтащхьэ Моисеев Евгений, къалэ Думэм и унафэщI Волошинэ Любовь, диным я лIыкIуэхэр, къалэ-зыгъэпсэхупIэм щыпсэухэр.
Благочиннэм Пятигорск, Черкесск щIыналъэхэм я архиепископ Феофилакт и псалъэр ялъигъэIэсащ икIи къыхигъэщащ фIэщхъуныгъэ зэрамыIэм щIэпхъэджагъэ къызэришар, терроризмым и лъабжьэр. Щоджэным къулыкъур иригъэкIуэкIащ, террористхэм яукIа къардэн Тарабаев Николай зэи зэращымыгъупщэнур къыхигъэщащ. Терроризмым хэкIуэдахэм зы дакъикъэкIэ яхуэщыгъуащ зэхыхьэм хэтхэр икIи фэеплъым удз гъэгъахэр тралъхьащ.
А махуэм Чристэн Свято-Никольскэ классическэ гимназием щоджэн Иоанн (Галумов) сабийхэм яжриIащ XXI лIэщIыгъуэм и къэхъугъэ гузэвэгъуэхэр зыхуэдар икIи хэкIуэдахэм я фэеплъу зэхыхьэм хэтхэм шэху уэздыгъэхэр пагъэнащ.
2024 гъэм фокIадэм и 3-м ЕссэнтIыгу къалэм и школ №1-м пэкIукIэ щрагъэжьащ гъэ еджэгъуэр, терроризмым пэщIэтыным и махуэр. ПэкIум щызэхуэсащ еджакIуэхэр, егъэджакIуэхэр, ирагъэблэгъа хьэщIэхэр, ЕссэнтIыгу члисэ округым щIалэгъуалэм ядэлэжьэнымкIэ и благочиннэм и дэIэпыкъуэгъу щоджэн Гриценкэ Виталий. Щоджэныр къызэхуэсахэм я пащхьэм къыщыпсэлъащ икIи жиIащ терроризмым пэщIэтыным и мыхьэнэр, мамырыгъэр хъумэн зэрыхуейр.
Щоджэнхэр зыхэта фэеплъ пэкIухэр Къэбэрдей-Балъкъэрми Къэрэшей-Шэрджэсми щызэхэтащ, телеграмм-каналым дыщытепсэлъыхьащ.
***
Илъэс 20 и пэкIэ къэхъуа Iуэхухэм я фэеплъ махуэр ягъэувыныр къызыхэкIар 2004 гъэм фокIадэм Осетие Ищхъэрэ-Алание республикэм и Беслъэн къалэм и курыт еджапIэ №1-м террористхэм яубыду цIыху 334-рэ зэрыхэкIуэдарщ. Абы щыщу 186-р сабийщ. 2003 гъэм а махуэм гъущIгъуэгум Кисловодск къикI мафIэгум иса лажьэншэ цIыху пщIы бжыгъэхэр щыхэкIуэдащ террористхэм я зэранкIэ.