2024 гъэм фокIадэм и 2-м къалэм и Чристэн Свято-Никольскэ классическэ гимназием щIэныгъэм и махуэшхуэр щагъэлъэпIащ.
Махуэшхуэ программэм и пэ къихуэу, гимным и макъамэм щIэту гимназием и гъэсэн нэхъыфIхэу Писоцкий Александррэ Землянская Серафимэрэ УФ-м и ныпыр яIэтащ, гимназием и штандартыр еджакIуэхэм къыщIахащ.
Махуэшхуэр тхьэлъэIукIэ ирагъэжьащ. Гимназиер къызэзыгъэпэща, Пятигорск, Черкесск щIыналъэхэм я архиепископ Феофилакт еджакIуэхэмрэ егъэджакIуэхэмрэ фIыщIэ яхуищIащ икIи псоми псы гъэнэхуам щыщ ялъигъэIэсащ, япэ классым кIуэхэм ар ягу ирихьащ. Щихънагъыр псоми ЩIэныгъэм и махуэмкIэ ехъуэхъуащ, егъэджакIуэхэр я IэщIагъэм зэрыхуэпэжымкIэ фIыщIэ яхуищIащ, гимназием и еджакIуэхэмрэ лэжьакIуэхэмрэ гъэ еджэгъуэр къехъулIэну ехъуэхъуащ.
Апхуэдэу зэхыхьэм и хьэщIэхэу Кисловодск къалэ думэм и унафэщI Волошинэ Любовь, Кавказ Ищхъэрэм и Думэм и депутат Мурашкэ Николай, Кисловодск къалэ зыгъэпсэхупIэм и администрацэм и лIыкIуэ Корнильевэ Еленэ, «Ставрополец РФ» жылагъуэ фондым и унафэщI Голиков Сергей сымэ егъэджакIуэхэмрэ гимназием и гъэсэнхэмрэ ехъуэхъуащ. Голиков Сергей 11 классым щIэс Землянская Серафимэ иритыжащ фIыщIэ тхылъ, «Ставпомощь.РФ» мыхьэнэ зиIэ волонтер проектым жыджэру зэрыхэтам папщIэ. Къалэ –зыгъэпсэхупIэм и МВД-м и къудамэм и унафэщI Рябошапкэ Олег гимназием тыгъэ хуищIащ псым папщIэ кулер.
Махуэшхуэм усэ къыщеджащ, школым, унагъуэм теухуа уэрэдхэр щыжаIащ. Унагъуэр дэркIэ псом я щхьэщ! Ар ди лъэпкъщ, хабзэщ, зэкъуэтыныгъэщ, зэгурыIуэщ.
«Унагъуэм и илъэс» Iуэхум хыхьэу, япэ уэзджынэм и махуэшхуэм ирагъэблэгъащ гимназиер къэзыуха унагъуэр, мы гъэм хэхъуэ зиIэр. Унагъуэм и нэхъыжь Кравец Иван – дзэ офицерщ, дзэ Iуэху хэхам и ветеранщ, Жуковым и медалыр къратащ, «Прекрасное далеко» уэрэдыр жиIащ. Иван псоми махуэшхуэмкIэ ехъуэхъуащ икIи игу къигъэкIыжащ гимназием щеджа илъэсхэр.
Гимназиер къэзыух Шевченкэ Николайрэ япэ классым кIуэ Нехорошковэ Есениерэ япэ уэзджынэр кърагъэуащ.
Махуэшхуэр щызэхуащIыжым, Щихънагъым къыхигъэщащ гимназием и щIэныгъэмрэ зыужьыныгъэмрэ теухуауэ абы и унафэщI щоджэн нэхъыжь Знаменский Иван зэфIигъэкIхэр. УнафэщIым фIыщIэ хуищIащ щихънагъ Феофилакт.
Зэхыхьэр щиухым архиепископ Феофилакт и гъусэу япэ классым кIуэхэм сурэтхэр зытрагъэхащ щихъ Радонижский Сергий и фэеплъым деж.
Архиепископ Феофилакт япэ классым кIуэхэм дерс яритащ. Пастыр нэхъыщхьэр сабийхэм ехъуэхъуащ гимназием ныбжьэгъухэр щызрагъэгъуэтыну, фIыуэ щеджэну, я адэ-анэхэр ягъэгуфIэну икIи IэфIыкIэхэр тыгъэ яхуищIащ.