Дагъэ зыщIэлъ шхыныгъуэхэм я тхьэмахуэм, мэремым Чристэн Свято-Никольскэ классическэ гимназием и унафэщIымрэ класс нэхъыжьхэм щIэсхэмрэ IущIащ Пятигорск, Черкесск щIыналъэхэм я архиепископ Феофилакт.
«Искусственный интеллект и его воздействие на человека» аращ зэIущIэр зытеухуауэ щытар. Абы хыхьэу къытеувыIащ щIэблэм я гъащIэм теухуахэм, Iуэху зэIумыбзхэм.
Щихънагъым щыIущIам, къэзакъхэм я щIэблэм ягъэлъэгъуащ шашкэр зэрагъэIэкIуэлъакIуэр, музыкэ номери утыку кърахьащ. Щихънагъ Феофилакт фIыщIэ хуищIащ къэзакъ Поминарнев Александр ныбжьыщIэхэр шы къэжыхьын хабзэм зэрыхуигъасэм папщIэ.
ЗэIущIэр щекIуэкIам, гимназием и хорым игъэзэщIащ «На улице мира» уэрэдыр. АбыкIэ ныбжьыщIэхэр зэпеуэм щытекIуащ икIи «Орленок» урысейпсо сабий центрым ирагъэблэгъащ. Апхуэдэу гимназием и гъэсэнхэм Щихънагъыр ягъэгуфIащ хорыр Патриаршэ благочинием и тхьэлъэIум зэрыхэтынум теухуа хъыбарымкIэ.
Шей здефэм Щихънагъ Феофилакт IэрыщI интеллектым тепсэлъыхьащ, абы къызэригъэпэща псори зэрыгъэщIэгъуэным, ауэ псэ зэрыхэмытым. Абы и щапхъэу къихьащ IутIыж узэщIыныгъэр. Псори пэжми, ар псэ хуэныкъуэщ. Щихънагъыр къытеувыIащ урыс щIэныгъэлI Черниговская Татьянэ нейрощIэныгъэмрэ психолингвистикэмрэ теухуа и къэхутэныгъэхэм, цIыху щхьэкуцIым и лэжьэкIэм теухуа тхылъ къыдэзыгъэкIам. Пастыр нэхъыщхьэм ягу къигъэкIыжащ апостол Павел и псалъэхэр: «СыцIыху тхьэмыщкIэщ сэ. Гуапагъэ сызыхуейр сщIэкъым, сызыхуэмей бзаджэр солэжь».
ИужькIэ Щихънагъым жэуап иритащ еджакIуэхэм я упщIэхэм. Языныкъуэ упщIэхэр теухуауэ щытащ лъагъуныгъэмрэ зэныбжьэгъугъэмрэ, унагъуэ зэхущытыкIэхэм, гъащIэ гъусэ къызэрыхэпхынум.
Зэпсэлъэныгъэм щыпащэм, архиепископ Феофилакт литературэм, фильмхэм, иджырей щIалэгъуалэм я Iуэху зэIумыбзэм – электрон тутын зэрефэм къытеувыIащ.
Зэпсэлъэныгъэр и кIэм щынэблагъэм Щихънагъым къыхуриджащ Тхьэм и арэзыныгъэр зрагъэгъуэтыну икIи гимназием и гъэсэнхэр гуапагъэм и гъуэгум ирикIуэну.
Гимназием и унафэщI щоджэн нэхъыжь Знаменский Иоанн Пастыр нэхъыщхьэм фIыщIэ хуищIащ зэIущIэм къазэрыхуеблэгъамрэ гимназием и егъэджакIуэхэмрэ еджакIуэхэмрэ зэриузэщIымрэ папщIэ.